Yemesi 2 - ALLALA KUMƐ

Makawandili Lafisayali-Koe Rɔ

¹ N na-kelen-nyɔgɛnu, wole minnu dɛnkɛninyanɛ ma Mari Yisa, Allata-Mɔgɔ-Yabɔnɛ ma, gbiliya-tigi, kɔni, wo kana mɔgɔ bira-nya lafisaya anu nyɔgɔn ko a yen-nya fɛ mumɛ!

² Tumado, nɔnfulu-tigi do ni ta wola ladɛn rɔ, sɛnɛ-dɛɛn ye a bole la, kura-hakikɛ ye a ma. Bolo-kolɔn fanan ni ta, kura-korenu bi a ma.

³ Kei min tabɛnnɛ a kin na, ni wo ya wo gbiliya ka a fɔ a ye ko, “I mayigi kan-tina-nyimɛ kɛ rɔ,” kɔnɔ i ni ta a fɔ bolo-kolɔn wo ye ko, “I sɔnɛ ni to, ni wo ma, i ni i sigi dugi ma n kin kɔrɔ yan,”

⁴ i ya nfen ma wo la? Wo yilikinɛ lafisayalɛ bolo worɔ wo nyɔgɔn tɛma. Wola kiti-tɛgɛ-yogomɛ kɛ ma kin mumɛ!

⁵ N diyana na-kelen-nyɔgɛnu, wo ni wo tole masɔ! Alla ara bolo-kolɔnnu yabɔ duninya kɛ rɔ ka anu nama-a-la dɛnkɛninyɛ rɔ. Alla di minnu ye, wonu si mansayɛ sɔrɔn iko a ara lanyiri kiri anu ye nya min.

⁶ Kɔnɔ wole ye bolo-kolɔnnu nafɛyala dɛɛ, ado yon bi wo niyi ragbɛrɛnna ka wo lafili kiti tɛgɛ tinɛ? Nɔnfulu-tiginu denu si wo ma!

⁷ Alla ara tɔgɔ-nyimɛ min di wo ma, wonu denu bi kuma-yogomɛ fɔla wo ma.

⁸ Tɔn-kolomɛ kelen de Allala kitabu rɔ, ni wo ya wo bira, wo ara ko-nyimɛ kɛ worɔ. A ko, “I ni i sigi-nyɔgɛ keni iko i nyɛrɛ.”

⁹ Kɔnɔ ni wo ya mɔgɛnu bira iko anu yen-nya ye nya min, hakɛ le wo la. Tɔn fanan bi wo yilikila bawo wo ara ma tɔn-tinyanɛ la.

¹⁰ Hali mɔgɛ ya Allata tɔn bɛɛ bira kɔnɔ a ni kelen dɔrɔn tinya, a ara yiliki sɔrɔn a bɛɛ rɔ.

¹¹ Bawo kitabu min ya a fɔ ko, “I kana yɛlɛnyɛ kɛ,” wo le ya a fɔ fanan ko, “I kana mɔgɔ faga.” Nba, hali i ma yɛlɛnyɛ kɛ kɔnɔ ni i ya mɔgɔ faga, i wara ma tɔn-tinyalɛ la worɔ.

¹² Wo ni a ma wo fɛrɛma kumɛ anubɛ ko-ladan-tinɛ bawo Allala kumɛ min si ma hɔrɔya, lunyɛ do, Alla si ma bɛɛ kiti wo fɛ.

¹³ Alla tenbi kinikinibɛlɛnu kitila tumɛ min, a ti kinikini wonu ma. Kɔnɔ kinikini tigi wa sɔ kiti tɛgɛ tinɛ, Alla si kinikini wo tigi ma.

Dɛnkɛninyɛ anubɛ Kɛwɔlɛnu

¹⁴ N na-kelen-nyɔgɛnu kana a fɔ ko, “Dɛnkɛninyɛ ye n bolo,” ni ila kɛwɔlɛnu ma a yira. Wo si nfen nyinya i ma? Ita dɛnkɛninyɛ wo si ke i kisila worɔ, wa?

¹⁵ Tumado, ma na-kelen-nyɔgɛ donu bi nyɔ, fɛrɛya-bɔ sa anu bolo, dɔn-fen sa anu bolo.

¹⁶ Ni wo ya a fɔ wonu ma ko, “Allata duwɛ ni to wo kuma bɛrɛkɛ! Alamɛ kimɛ ma wo bira. Alamɛ wo ya dɔn-fan sɔrɔn ka fa gben!” Kɔnɔ wo ma anu makoe nyinya, wo si nfen nyinya anu ma? Wola duwɛ bɛɛ fu!

¹⁷ Dɛnkɛninyɛ fanan bi wo nya na le. Ni a ye a dan na, kɛwɔlɛnu sa a fɛ, a faganɛ le worɔ.

¹⁸ Tumado, mɔgɛ do si a fɔ ko, “Dɛnkɛninyɛ ye ile bolo kɔnɔ kɛwɔlɛnu bi nde bolo.” N si a yabi ko, “I si ila dɛnkɛninyɛ mayira nya min, ni kɛwɔlɛnu sa a fɛ, wo yira n na. N si nta dɛnkɛninyɛ yira i la nta kɛwɔlɛnu fɛ.”

¹⁹ I lanɛ a la ko Alla kelen pe le nyɔ, nyɛ? Wo kin! Nyinɛnu fanan lanɛ wo la ka yɛrɛyɛrɛn kilan bolo.

²⁰ Ile kun-takolɔn, fɔ n ba a yira i la ko dɛnkɛninyɛ ti ko-wo-ko nyinya mɔgɛ ma ni ata kɛwɔlɛnu ma telen.

²¹ Ma benba Iburayima telenta Alla ye kilɛ nyuman fɛ? Wo kɛra ala kɛwɔlɛnu fɛ wo tumɛ a ya ala den Isiyaka bɔ sarakayɛ la saraka-bɔ-tinɛ kuma.

²² Wo ma a yen, ba? Ala dɛnkɛninyɛ anubɛ ala kɛwɔlɛnu wɔlita anu nyɔgɔn fɛ. Ala dɛnkɛninyɛ bɔra gbɛ rɔ ala kɛwɔlɛnu fɛ.

²³ Allala kitabu ya min fɔ, wo mara tonyɛ la worɔ. A ko, “Iburayima dɛnkɛninyara Alla ma, ado ala dɛnkɛninyɛ wo fɛ, Alla ya a rabira iko mɔgɔ-latelennɛ.” Alla ya a kele ko, “N diyana-mɔgɛ, Iburayima.”

²⁴ Nba, wo ara a yen? Mɔgɛ si telen Alla ye ala kɛwɔlɛnu denu fɛ. A ti telen ala dɛnkɛninyɛ dɔrɔn fɛ.

²⁵ Yɛlɛn-musi, Rehabi don! Wo fanan mara wo nya na le. A telenta Alla ye ala kɛwɔlɛnu denu fɛ bawo a ya Yahudiyanuna ko-lakɔrɔsilɛnu rabira a kin na ka anu nasɛgi kila-gbɛrɛkɛ fɛ.

²⁶ Nba, iko fɛrɛ-bɔnku-faganɛ ye nya min, niyi sa a rɔ, dɛnkɛninyɛ fanan faganɛ wo nya le, ni kɛwɔlɛnu sa a fɛ.