Yasowa 21 - ALLALA KUMƐ

Lifayi Bɔnsɔn-Mɔgɛnuta Soenu Sɔrɔn-Koe

^1-2 Saraka-Masɔla Ɛliyasa wo, Yasowa wo, anubɛ Isirɛla bɔnsɔn kebila-kun-tiginu ya anu daga makɛ Sailo. Lifayi bɔnsɔn kebila-kun-tiginu tara kun-tiginu bara Sailo ka a fɔ anu ye ko, “Mari ya a fɔ Nɛbi Musa ye fɔlɔ nun ko ma si mata soenu sɔrɔn anubɛ mata kolo-fannu de-nyini-tinɛnu nyamanɛ kɛ rɔ.”

³ Iko Mari ya a fɔ Isirɛla mɔgɛnu ye nya min, anu ya soe donu di Lifayi mɔgɛnu ma anubɛ anuna kolo-fen de-nyini-tinɛnu anuna nyamanɛnu tɔ. Anuna soe wonu denu bi kɛnu na.

⁴ (Lifayi ya den mɔgɔ sawa sɔrɔn, Kohati wo, Mɛrari wo, anubɛ Kɛrisɔn.) Kohati bɔnsɔn mara a fɔlɔtɛ la min ya ata soenu sɔrɔn. Anu ya so-kun tan-ni-sawa sɔrɔn Yuda, Simiyɔn anubɛ Bɛnyamɛ sibolenu tɛma.

^9-16 Kohati mamanɛ Aruna ya so-kun kɔnɔntɛ min sɔrɔn Yuda anubɛ Simiyɔnta nyamanɛ rɔ, wo le kɛnu na, Libina wo, Yatiri wo, Ɛsitɛmowa wo, Holɔn wo, Diba wo, En wo, Yuta wo, anubɛ Bɛti-Simɛsi. Anu ya Hiburɔn soe sɔrɔn Yuda kɔnkɔ-nyamanɛ rɔ, anu ya min ma lakisi-soe la. A kɔnɔntɔ nyɔgɛ le wo la. Anu bi soe wo kelela nun Araba. (Anaki fa le Araba la min tɔgɛ sara soe kɛ kuma nun.) Kan tinɛ min bɛɛ ye Hiburɔnla minɛ rɔ anubɛ a so-mɛsɛnɛnu, wo bɛɛ dira Kelabu ma fɔlɔfɔlɔ. Kɔnɔ Hiburɔn soe nyɛrɛ anubɛ a kolo-fen de-nyini-tinɛnu dira Aruna kebila-mɔgɛnu ma.

¹⁷ Anu ya so-kun nanɛ minnu sɔrɔn Bɛnyamɛta nyamanɛ rɔ, wo le kɛnu na, Kibiyon wo, Kiba wo,

¹⁸ Anatɔti wo, anubɛ Alamɔn.

¹⁹ Kohati mamanɛ Aruna ya soe minnu sɔrɔn, wo bɛɛsi lakofunɛ so-kun tan-ni-sawa.

⁵ Kohati bɔnsɔn-toe ya so-kun tan sɔrɔn.

²⁰ So-kun nanɛ minnu tora anu ye Ifɛrɛmta nyamanɛ rɔ, wo le kɛnu na,

²¹ Sɛkɛm min bi Ifɛrɛmta kɔnkɔ-nyamanɛ rɔ wo, (lakisi-soe le wo la) Kisari wo,

²² Kibiseyim wo, anubɛ Bɛti-Hɔrɔn.

²³ Anu ya so-kun nanɛ minnu sɔrɔn Danta nyamanɛ rɔ, wo le kɛnu na, Ɛlɛtɛki wo, Kibɛtɔn wo,

²⁴ Aiyalɔn wo, anubɛ Kati-Rimɔn.

^25-26 Anu ya so-kun filɛ minnu sɔrɔn Manasata nyamanɛ rɔ Yorodan bɛ tele-yigi wara la, wo le kɛnu na, Teyanaka anubɛ Kati-Rimɔn.

⁶ Kɛrisɔn kebila-mɔgɛnu ya so-kun tan-ni-sawa sɔrɔn.

²⁷ Anu ya so-kun filɛ minnu sɔrɔn Manasata nyamanɛ rɔ Yorodan bɛ kɔma tele-bɔɛ wara la, wo le kɛnu na, Kolan min bi Basan nyamanɛ rɔ (lakisi-soe le wo la) anubɛ Bɛ-Ɛsɛtɛra.

²⁸ Anu ya so-kun nanɛ minnu sɔrɔn Isakarita nyamanɛ rɔ, wo le kɛnu na, Kisiyɔn wo, Dabɛrati wo,

²⁹ Yaramuti wo, anubɛ Ɛnganim.

³⁰ Anu ya so-kun nanɛ minnu sɔrɔn Asɛrata nyamanɛ rɔ, wo le kɛnu na, Maisali wo, Abadan wo,

³¹ Hɛlakati wo, anubɛ Rihobu.

^32-33 So-kun sawɛ minnu tora anu ye Nafatalita nyamanɛ rɔ, wo le kɛnu na, Kidɛsi min bi Kalili nyamanɛ rɔ wo (lakisi-soe le wo la) Ham-Mati wo, Dɔɔ wo, anubɛ Karatan.

⁷ Mɛrari kebila-mɔgɛnu ya so-kun tan-ni-fila sɔrɔn.

³⁴ Anu ya so-kun nanɛ minnu sɔrɔn Sɛbulɔnta nyamanɛ rɔ, wo le kɛnu na, Yakanayim wo, Karata wo,

³⁵ Dimina wo, anubɛ Nahalali.

³⁶ Anu ya so-kun nanɛ minnu sɔrɔn Rubɛnta nyamanɛ rɔ, wo le kɛnu na, Bisa wo, Yehasi wo,

³⁷ Kidɛmoti wo, anubɛ Mɛfeyati.

³⁸ So-kun nanɛ minnu tora anu ye Kadita nyamanɛ rɔ, wo le kɛnu na, Ramɔti min bi Kaliyadi nyamanɛ rɔ wo (lakisi-soe le wo la) Mehaneyim wo,

^39-40 Hɛsibɔn wo, anubɛ Yasa.

⁸ Isirɛla mɔgɛnu ya wo kumɛ bɛɛsi bira iko Mari ya a fɔ Musa ye nya min. Anu ya soe wonubɛ anuna kolo-fen de-nyini-tinɛnu di Lifayi bɔnsɔn ma koron-nakɛ fɛ.

^41-42 Soe minnu bɛɛ dira Lifayi bɔnsɔn-mɔgɛnu ma anubɛ anuna kolo-fen de-nyini-tinɛnu, wonu damasi lakofunɛ mara so-kun bi-nani ani so segin la.

⁴³ Mari ya nyamanɛ wo bɛɛsi di Isirɛla mɔgɛnu ma iko a ya lanyiri kiri anu benbanu ye nya min. Anu tara ka nyamanɛ wo mɔgɛnu kɛlɛ ka anu nɔ. Anu tora nyɔ.

⁴⁴ Mari ya yisi-kimɛ di anu ma iko a ya lanyiri kiri anu benbanu ye nya min fɔlɔn. Hali sibolo-kelen-bɛrɛn ma nɔ-ko sɔrɔn anu ma bawo Mari ya sɛnbɛ di Isirɛla mɔgɛnu ma anu yogenu kuma kɛlɛ-kɛ-tinɛ.

⁴⁵ Mari ya lanyiri kiri anu ye fan min bɛɛla ko la, anu ya wo bɛɛ sɔrɔn.