Yasowa 17 - ALLALA KUMƐ

Manasa Bɔnsɔn-Mɔgɛnuta Dugu Sɔrɔn-Koe Tele-Yigi Wara La

¹ Manasala den-kei-sarɛ Makiri ya dan do sɔrɔn min tɔgɛ Kaliyadi. Makiri wola kebilɛ ya Kaliyadi anubɛ Basan nyamanɛ sɔrɔn Yorodan bɛ kɔma tele-bɔɛ wara la bawo kɛlɛ-kurugbɛ le ale la nun.

² Wo le ya a ma, nyamanɛ min bi Yorodan bɛ kɔma tele-yigi wara la, nyɔ-soenu dira Manasala tolo-birɛ kɛnu ma anubɛ anuna kebilɛnu, Abiyɛsa, Helaki, Asirɛli, Sɛkɛm, Hifa, anubɛ Sɛmida. Yusufula kegeyɛ le kɛnu na, a keimɛnu, kɔni. Wo bɛɛ mara kebila-kunyɛnu na.

³ Manasala tolo-birɛ Kaliyadila den Hifa, wola dan Silafihadi ma den-kei sɔrɔn, fɔ dunmusi mɔgɔ loli. Wonu tɔgɛ le kɛnu na, Mala, Nowa, Hagila, Milaka, anubɛ Tirisa.

⁴ Musi wonu tara Ɛliyasa, Yasowa anubɛ Isirɛla mɔgɔ-banu wara ka a fɔ anu ye ko, “Mari ya a fɔ Musa ye fɔlɔn ko a ni mata nyamanɛ di ma ma iko ma benba na-kelen-nyɔgɛnu bi a sɔrɔnna nya min.”

^5-6 Manasa bɔnsɔn ya anuta nyamanɛ sɔrɔn Yorodan bɛ tɔnkɔn filɛ bɛɛ rɔ. Nyamanɛ min bi Kaliyadi anubɛ Basan nyamanɛnu tɔ Yorodan bɛ tele-bɔɛ wara la, wonu bɔnɛ a la, Manasata nyamanɛ min bi Yorodan bɛ tele yigi, wo talata sigi-tina tan la. Sigi-tina loli tora musi loli wonu ye. A to loli dira anu benba na-kelen-nyɔgɛnu ma iko Mari ya a fɔ Nɛbi Musa ye nya min nun.

^7-8 Manasata nyamanɛ ya a dabira Asɛra nyamanɛ ma ha ka ke Mikimita soe ma Sɛkɛm soe tele-bɔɛ wara la. Dan wo tara dugu la ha ka ke Tapuwa tenke ye kan min kɔnɔ Tapuwa soe ye Ifɛrɛm bɔnsɔn bolo.

⁹ Dan wo yigira tun dugu la ha ka ke Kena yi ma. Manasata nyamani-dan manɛ Kena yi la dugu la ha ka a labila kɔgɔ-yi ma, ado Ifɛrɛmna soe doinu basannɛ Manasala nyamanɛ la.

¹⁰ Ifɛrɛmna nyamanɛ tora Kena yi dugu la. Manasatɛ tora kantɔ ka ta a labɔ kɔgɔ-yi ma. Manasala nyamanɛ kantɔ-dan ya a labila Isakarila nyamanɛ ma tele-bɔɛ wara la anubɛ Asɛrata nyamanɛ ma tele-yigi wara la.

¹¹ Manasa ya soe donu sɔrɔn Isakari anubɛ Asɛrata nyamanɛnu tɔ. A ya soe minnu sɔrɔn, wo le kɛnu na, Bɛti-San, Ibiliyam, Dɔɔ min bi kɔgɔ-yi tina, Ɛndɔ, Teyanaka anubɛ Magidɔ ka wo sa anu dafɛ-so-nɛnu kuma.

¹² Hali wo, Manasa mɔgɛnu ma ke Kenan mɔgɛnu gbenna soe kɛnu tɔ.

¹³ Kɔnɔ Manasa mɔgɛnu siyayara tumɛ min, anu ma Kenan mɔgɛ wonu gben fɔ ka anu ma yɔɔnnu na.

Dugi Do Matara-Koe Ifɛrɛm anubɛ Manasa Bɔnsɔn-Mɔgɛnu Bolo

¹⁴ Yusufula den filɛ, wonu bɔnsɔnnu nara Yasowa wara ka a manyinika ko, “Nfenna i wara nyamani-dɔgɔmanɛ kɛ di ma ma? Ma kebilɛ siya nyamanɛ kɛ ko bawo Mari ara ata duwɛ layigi ma kuma. I yandi, mata nyamanɛ makofu.”

¹⁵ Yasowa ya anu yabi ko, “Kan-tina-siyaman bi nyɔ wo ma ke bɛ kan min. Wo ta gbɔngbɔn-wɛ rɔ Perasa mɔgɛnu anubɛ Rɛfayim mɔgɛnuna nyamanɛ rɔ. Wo ni kɔlɔmanu tɛgɛ nyɔ ka nyɔ ladan wo nyɛrɛ ye.”

¹⁶ Yusufu bɔnsɔn ya a fɔ a ye ko, “Mata kɔnkɔ-nyamanɛ kɛ ma kolo. Ma ti kun yan, ado ma kilannɛ Kenan mɔgɛnu na minnu bi Yorodan bɛ fɛ bawo nɛgɛ-kirindinu bi anu bolo. Donu bi wonu bolo minnu siginɛ Bɛti-San soe burɔ anubɛ a dafɛ-so-mɛsɛnu fanan. Hali minnu bi Yɛsɛreli lɛɛ rɔ, donu bi wonu fanan bolo.”

¹⁷ Yasowa ya anu yabi ko, “Wo ara tonyɛ fɔ kɔnɔ wo siya, ado wo sɛnbɛ kolo anu ko fanan.

¹⁸ Wo si ta ka nyɔ-kɔlɔmanu tɛgɛ. Wo ni nyɔ ladan wo nyɛrɛ ye. N ya a lɔn ko wo si ke Kenan mɔgɛnu gbenna le. Hali anuna nɛgɛ-kirindinu siya, wo si ke ka anu nɔ feu!”