Yasowa 16 - ALLALA KUMƐ

Ifɛrɛm anubɛ Manasa Bɔnsɔn-Mɔgɛnuta Dugu Sɔrɔn-Koe

¹ Nyamanɛ min dira Yusufula den Ifɛrɛm bɔnsɔn-mɔgɛnu ma, wonuna nyamanɛ-dan dabirara Yorodan bɛ ma dugu la tenkenu bi kan min Yɛrikɔ tele-bɔɛ wara la. Dan wo le tenbira Yɛrikɔ soe la ka tenbi wulɛ rɔ ha ka ke kɔnkɔ-nyamanɛ ma ha ka ta ke Bɛtɛli soe ma.

² Ka bɔ nyɔ, dan wo le tara ha Lusi soe ka tenbi nyɔ ha Ataroti-Ada soe ma Araka mɔgɛnu bi kan min.

³ Dan wo le tara ha tele-yigi wara la Yefɛleti mɔgɛnu bi kan min ha ka ke Bɛti-Hɔrɔn soe ma min bi kɔnkɛ kɔrɔ. Ka bɔ nyɔ, dan wo le tara ha Kisari soe. Anuna dan kɛ mara kɔgɔ-yi la.

⁴ Nyamanɛ kɛ tora Yusufula dannu Ifɛrɛm anubɛ Manasa bɔnsɔn-mɔgɛnu ye, Manasa bɔnsɔn-mɔgɛ minnu bi Yorodan bɛ tele-yigi wara la, kɔni.

Ifɛrɛm Bɔnsɔn-Mɔgɛnuta Dugu Sɔrɔn-Koe Tele-Yigi Wara La

⁵ Dan min bi dugu la, wo ya a dabira Ataroti-Ada soe tele-bɔɛ wara la ka ta Bɛti-Hɔrɔn soe min bi kɔnkɛ kuma

^6-7 ha ka ke kɔgɔ-yi ma. Dan min bi kantɔ, wo dabirara Yorodan bɛ ma ha ka ta Yɛrikɔ soe ka yɛlɛ ha Neyarati anubɛ Ataroti soenu bi kan min. A bɔra nyɔ ka ta Yanowa soe ka tenbi Teyanati-Sailo tele-bɔɛ wara la ka ta Mikimita soe.

⁸ A tara Tapuwa soe ka ke Kena yi ma. A bilara yi wo fɛ ha ka ta ke kɔgɔ-yi ma. Ifɛrɛm bɔnsɔn-mɔgɛnu ya kan tinɛ kɛ le bɛɛ sɔrɔn.

⁹ Ifɛrɛm bɔnsɔn ya soe donu sɔrɔn Manasa bɔnsɔn-talɛta nyamanɛ rɔ min bi Yorodan bɛ tele-yigi wara la.

¹⁰ Ifɛrɛm bɔnsɔn ma Kenan mɔgɛnu gben Kisari soe rɔ fɔ ka anu ma anuna yɔɔnnu na. Ha bi, wonu bi nyɔ.