Yasowa 13 - ALLALA KUMƐ

Nyamani-Bibɛlɛnu Wara-Koe

¹ Yasowa kɔrɔyara tumɛ min, Mari ya a fɔ a ye ko, “I wara kɔrɔya kɔnɔ hali wo, nyamanɛ donu bi nyɔ wo si minnu kɛlɛ tun.

^2-3 Wo ma Filisiti kɛnuna nyamanɛ bi wɛ anu bolo. Anuna so loli wo le kɛnu na, Kesa, Asadadi, Asikalɔn, Kati, anubɛ Ɛkirɔn. Fɔ wo wa Kesa kɛnuna nyamanɛ bi min bi Iyipiti tele-bɔɛ anubɛ Afim kɛnuna nyamanɛ min bi dugu la. Nyamanɛ min ya a dabira Sihɔ bɛ ma Iyipiti dan la ka dan Ɛkirɔn soe ma, wo ma wo fanan bi wɛ.

⁴ Wo ma Kenan mɔgɛnuna nyamanɛ bi wɛ min ya a dabira Meyara soe ma Sadon da kɔrɔ. Kenan mɔgɛnu dan le Afɛki soe la, Amora kɛnuna nyamanɛ-dabirɛ, kɔni.

⁵ Wo ma Kiba mɔgɛnuna nyamanɛ bi wɛ. Wo ma Lɛbanan mɔgɛnuna nyamanɛ bi wɛ min dabirɛ Beyali-Kadi soe ma Hɛrɔman kɔnkɛ kɔrɔ ha ka ke Hamati kɔnkɔ-gbɛran ma,

⁶ katarala Sadon kɛnu ma min bi kɔnkɔ-nyamanɛ rɔ Misirofa-Maim soe anubɛ Lɛbanan kɔnkɛnu tɛma.

⁷ I ni nyamanɛ kɛ ratala Isirɛla bɔnsɔn kɔnɔntɔ anubɛ a talɛ tɛma iko n ya a fɔ i ye nya min fɔlɔ nun.”

Nyamanɛ Ratala-Koe Yorodan Bɛ kɔma Tele-Bɔɛ Wara La

⁸ Rubɛn bɔnsɔn anubɛ Kadi bɔnsɔn anubɛ Manasa bɔnsɔn-talɛ ya anuta nyamanɛ sɔrɔn nun, Marita wɔli-kɛlɛ, Nɛbi Musa ya min di anu ma nun Yorodan bɛ kɔma tele-bɔɛ wara la.

⁹ Anuna nyamanɛ tara ha Arɔra soe min bi Anɔn lɛɛ anubɛ nyamanɛ min bɛɛ ye Dibon dugu la ha ka ke Midaba soe ma.

¹⁰ Anuna nyamanɛ danta Amon nyamanɛ la tele-bɔɛ wara la. Nyamanɛ wo soe bɛɛ taranta Mansa Saihɔn bolo nun ka a dabira Hɛsibɔn soe ma a siginɛ kan min.

¹¹ Hɛrɔman kɔnkɛ bɛɛ, anubɛ Basan nyamanɛ bɛɛ taranta anuna nyamanɛ rɔ ha ka ke Salaka soe ma anubɛ Kaliyadi nyamanɛ bɛɛ ha ka ke Kesa nyamanɛ anubɛ Meyaka nyamanɛ bɛɛsi rɔ.

¹² Mansa Ɔku min taranta sigini Asitɔra anubɛ Ɛdiriya soenu tɔ fɔlɔ nun, wota nyamanɛ fanan bi nyamanɛ wo rɔ. Musa ya nyamanɛ kɛ nɔ Isirɛla mɔgɛnu ye fɔlɔn.

¹³ Hali wo bɛɛ rɔ, Isirɛla mɔgɛnu ma Kesa anubɛ Meyaka mɔgɛnu gben. Wonu siginɛ tora anu tɛma ha kaka.

Lifayi Bɔnsɔn-Mɔgɛnuta Dugu Sɔrɔn-Koe

¹⁴ Musa ma nyamanɛ di Lifayi bɔnsɔn ma bawo Isirɛlata Mari Alla ara a fɔ nun ko, “Isirɛla mɔgɛnu bi sarakɛ minnu bɔla n ye, wo do si di Lifayi bɔnsɔn ma.”

Rubɛn Bɔnsɔn-Mɔgɛnuta Dugu Sɔrɔn-Koe

¹⁵ Musa ya nyamanɛ wo fara Rubɛn bɔnsɔn-mɔgɛnu na iko anu siya nya min.

¹⁶ Anuna nyamanɛ ya a dabira Yorodan bɛ ma tele-yigi wara la ka ke Anɔn bɛ ma ha kɔnkɛ min tasiginɛ ye Midaba soela foolɛ rɔ.

¹⁷ Wo le tara ha Hɛsibɔn soe anubɛ ala foolɛ rɔ. Soe minnu bi nyɔ, wonu tɔgɛ le kɛnu na, Dibon, Bemoti-Beyali, Bɛti-Beyali-Meyɔn,

¹⁸ Yehasi, Kidɛmoti, Mɛfeyati,

¹⁹ Kiriyateyim, Sibima, Sirɛti-Sehari min bi lɛɛ tɛma kɔnkɛ la,

²⁰ Bɛti-Piyɔri, Bɛti-Yɛsimoti, anubɛ Pisiga kɔnkɔ-kerikerinya, anubɛ Mansa Saihɔn ye mansayɛ la kan tinɛ min bɛɛ kun na nun fɔlɔ.

²¹ Musa ya Mansa Saihɔn faga tumɛ min, a ya Ɛfi wo, Rɛkɛm wo, Suri wo, Huri wo, anubɛ Reba fanan faga minnu bi mɔgɔ-bayɛ la Midiyan nyamanɛ rɔ. Wonu bi Mansa Saihɔn kɔrɔ nun.

^22-23 Isirɛla mɔgɛnu ya Beyorila dan Belam faga min bi duriyɛ kɛla nun. Yorodan bɛ mara Rubɛn nyamani-dan la tele-yigi wara la.

Kadi Bɔnsɔn-Mɔgɛnuta Dugu Sɔrɔn-Koe

²⁴ Musa ya nyamanɛ kɛ di Kadi bɔnsɔn-mɔgɛnu ma iko anuta kebilɛ siya nya min ka a dabira Rubɛnta nyamani-dan ma kantɔ-wara la.

²⁵ Yasa soe anubɛ soe min bɛɛsi ye Kaliyadi nyamanɛ rɔ, wo mara anutɛ la anubɛ Amon nyamani-talɛ ha ka ke Arɔra soe ma, Raba soe tele-bɔɛ wara la. Mansa Saihɔnta nyamani-toe wo bɛɛ sara Kadita nyamanɛ kuma,

²⁶ ka a dabira Hɛsibɔn soe ma ha Ramati-Misipa anubɛ Bɛtonim fanan ma, ha ka ke Mehaneyim anubɛ Diba min bi Kalili dalɛ dafɛ.

^27-28 Bɛti-Haram wo, Bɛti-Nimira wo, Sukɔti wo, Sefon minnu bi Yorodan bɛ dafɛ wo, soe wo bɛɛsi mara anutɛ la. Yorodan bɛ mara Kadita nyamani-dan la tele-yigi wara la ha ka ke Kalili dalɛ ma.

Manasa Bɔnsɔn-Talɛta Dugu Sɔrɔn-Koe

²⁹ Musa ya nyamanɛ kan tinɛ min di Manasa bɔnsɔn-tala-mɔgɛnu ma, wo le kɛ la.

³⁰ Basan nyamanɛ bɛɛ mara anutɛ la anubɛ a so bi-wɔrɔ min bi a rɔ ka a dabira Mehaneyim soe ma. So bi-wɔrɛ wo bɛɛ ye Manasala den Yeya bolo. Mansa Ɔku ara kan tinɛ kɛ bɛɛ mara nun.

³¹ Musa ya Kaliyadi nyamanɛ talɛ di Manasala den Makiri ma, Asitɔra anubɛ Ɛdiriya soenu bi kan tinɛ min tɔ, kɔni.

³² Nyamanɛ min bi Yorodan bɛ kɔma tele-bɔɛ wara la, Musa ya wo fara ka le a ye Mohabu nyamanɛ rɔ tumɛ min.

³³ Kɔnɔ Musa ma nyamani-fenfen di Lifayi bɔnsɔn-mɔgɛnu ma bawo Isirɛla mɔgɛnu bi kɔ-fan min dila anuta Mari Alla ma, anu denu bi anutɛ sɔrɔnna wo le tɔ.