Yasowa 12 - ALLALA KUMƐ

Mansɛnu Nɔ-Koe Musa Bolo Nun

¹ Mansɛ le kɛnu na Isirɛla mɔgɛnu ya minnu nɔ nun ka anuna soenu bi yanni anu ni tenbi Yorodan bɛ kɔma tele-bɔɛ wara la. Mansɛ kɛnuna nyamanɛ ya a dabira Anɔn bɛ ma ha ka ke Hɛrɔman kɔnkɛ ma anubɛ wo soenu ma minnu bi wulɛ rɔ tele-bɔɛ wara la.

² Isirɛla mɔgɛnu ya mansɛ minnuna soenu bi, a fɔlɔtɛ le Mansa Saihɔn la. Amora bɔnsɔn-mɔgɛ do le min siginɛ Hɛsibɔn soe rɔ. Ata nyamanɛ-dabirɛ le Anɔn bɛ ma dugu la ha ka ke Yabɔki bɛ ma Amon dan kantɔ anubɛ Kaliyadi nyamani-talɛ ma.

³ Ata nyamanɛ-dan tele-yigi, wo le Yorodan bɛ la ka a bi Kalili dalɛ ma min bi Dalɛ-Faganɛ wara la, ka ta ha Bɛti-Yɛsimoti soe ma ka ke Nibɔ kɔnkɛ ma.

⁴ Mansa fila nyɔgɔn le Mansa Ɔku la. Wo ye Basan nyamanɛ rɔ, ado a siginɛ Asitɔra anubɛ Ɛdiriya soenu tɔ. A bɔra Rɛfayim bɔnsɔn-mɔgɛnu tɔ kɔnɔ ata kebilɛ ma ara dɔgɔya.

⁵ Ɔkula nyamani-dabirɛ le Hɛrɔman kɔnkɛ ma ha ka ke Salaka soe ma ha ka ke Mansa Saihɔnta nyamani-dan ma Kaliyadi nyamanɛ rɔ anubɛ Basan nyamanɛ bɛɛ ha ka ke Kesa anubɛ Meyaka nyamani-dannu ma.

⁶ Musa anubɛ Isirɛla mɔgɛnu ya Mansa Saihɔn anubɛ Mansa Ɔku kɛlɛ fɔlɔ nun ka anu nɔ. Wo kɔma, Musa ya nyamanɛ wo di Rubɛn bɔnsɔn anubɛ Kadi bɔnsɔn anubɛ Manasa bɔnsɔn-talɛ ma.

So-Siyaman Nɔ-Koe Yasowa Bolo

⁷ Yasowa anubɛ Isirɛla mɔgɛnu ya soe minnu nɔ, wo dabirɛ le Beyali-Kadi soe ma min bi Lɛbanan lɛɛ rɔ ka ke Helaki kɔnkɛ ma min bi dugu la, Idɔm nyamanɛ da kɔrɔ. Yasowa ya nyamanɛ kɛnu fara Isirɛla bɔnsɔn kɔnɔntɔ ani a talɛ tɛma.

⁸ Kɔnkɔ-layan-bɛnu bi nyamanɛ kɛ tɛma. Gburukulinu bi a tele-bɔɛ wara la ka ta Yorodan lɛɛ rɔ. Donu bi a tele-yigi wara la fanan. A dugula wara la, kɛnkɛn-dugi le wo la. Yanni Yasowa anubɛ ala mɔgɛnu ni nyamanɛ wo bi, mɔgɛ minnu bi nyamanɛ kɛ rɔ nun, wo le kɛnu na, Hɛtinu, Amoranu, Kenannu, Perasanu, Hefanu anubɛ Yebusinu.

^9-24 So-mɛsɛ minnu bi nyamanɛ kɛ rɔ, wonu tɔgɛ le kɛnu na, Yɛrikɔ, Eyai min bi Bɛtɛli soe dafɛ, Yerusalɛm, Hiburɔn, Yaramuti, Lesi, Ɛkilɔn, Kisari, Diba, Kida, Hɔrima, Aradi, Libina, Adulam, Makida, Bɛtɛli, Tapuwa, Hɛfa, Afɛki, Lasarɔn, Medon, Hesɔ, Simirɔn-Mɛran, Akasafa, Teyanaka, Magidɔ, Kidɛsi, Yakanayim min bi Kamɛli wara la, Dɔɔ min bi kɔgɔ-yi dafɛ, Koyim min bi Kalili nyamanɛ rɔ anubɛ Tirisa. Soe kɛnu bɛɛsi anubɛ a mansɛ bɛɛ halakira Yasowa anubɛ Isirɛla mɔgɛnu bolo. A bɛɛ lakofunɛ mansa bi-sawa ani mansa kelen (31).