Yaburi 96 - ALLALA KUMƐ

Kabana-Ko-Mansɛ Alla Wara-Koe

¹ Wo ni bɛti-kurɛ bɔ Mari ye. Duninya mumɛ bɛɛ ni bɛti bɔ Mari ye.

² Mɔgɛ bɛɛsi ni bɛti bɔ Mari ye ka a tanto. A ye ma lakisila nya min, wo ni to wo rakaranna tuma-wo-tuma.

³ Alla gbiliyanɛ nya min anubɛ a ye kabana-koe minnu mala, wo ni wonu fɔ duninya-mɔgɛ bɛɛ ye.

⁴ Mari makawara. A bɛnta mɔgɛ ni ale le bato. Mɔgɛ ni kilan a la ka tenbi bɛsɛnu na.

⁵ Sibolo-gbɛrɛnu bi minnu kɔla, bɛsɛ le wonu na dɔrɔn! Kɔnɔ mata Mari, wo le ya san-kole dan.

⁶ A mayiginɛ kinyɛ anubɛ gbiliyɛ tɛma. Ala Bato-Bɔn lafanɛ sɛnbɛ anubɛ nyimayɛ la.

⁷ Mɔgɛ bɛɛsi ni a tanto duninya kɛ rɔ ka a tɛgɛ ata gbiliyɛ anubɛ ata sɛnbɛ ma.

⁸ Wo ni Mari tanto a tɔgɔ-gbiliyanɛla ko la. Wo na kɔ-fannu na wo bolo a bato tinɛ.

⁹ Ale wa na, wo ni wo madu a kɔrɔ ka a bato. Duninya-mɔgɛ bɛɛsi ni yɛrɛyɛrɛn a kɔrɔ.

¹⁰ Wo ni a fɔ sibole doinu ye ko, “Mari le mansɛ la.” Ale le ya dugu-kole kɛ sigi ka a banban, ado a la ti maga. A si mɔgɛnu kiti telenbagayɛ la.

¹¹ Alamɛ san-kole anubɛ dugu-kole sewara. Kɔgɔ-yi anubɛ nima-fan minnu bi a rɔ, wonu ni a lawɔyɔ.

¹² Alamɛ dugu nɔrɔnta ki-fannu kɔrɔ ka sewa. Gbɔngbɔntɔ-kɔlɔmanu si lɛnkɛ gbesi sewɛ la,

¹³ Mari wa na kiti tɛgɛ tinɛ lunyɛ min, kɔni. A si duninya-mɔgɛ bɛɛ mara telenbagayɛ anubɛ lafisayabɛlitayɛ la.