Yaburi 94 - ALLALA KUMƐ

Duninya-Kitilɛ Wara-Koe

¹ Mari, Alla le ile la min si karagbɛlɛnu tɔrɔ. Ita fondo-bɔɛ yira anu na.

² Duninya-mɔgɛ bɛɛ kiti-tɛgɛlɛ le ile la. I lakɔɛnma ka wasintenu sara iko anuta wasinteyɛ ye nya min.

³ E, Mari, karagbɛlɛnu bara mɛ sewɛ rɔ. Anu bara mɛ mankan tugula ha!

⁴ Ko-yogoma-kɛlɛnu si to anu wasila a la ha wati nyamintan? Anu bi anu wasila anuna ko-yogomɛnu na tolon!

⁵ Mari, anu bi ila mɔgɛnu bunden tinɛ le. Anu bi ita mɔgɛnu niyi ragbɛrɛnna anu ma.

⁶ Anu bi kɛɛ-musinu anubɛ kelennɛnu fagala. Anu bi ma warɛ-sundannu fagala.

⁷ Anu bi a fɔla ko, “Mari ya sa ma la. Isirɛlata Alla ma kɛ lɔn defan!”

⁸ Wole ko-yogoma-kɛlɛnu, nfenna hɛnkili sa wo bolo? Wole ye hɛnkili sɔrɔnna muntuma?

⁹ Alla min ya ma tole ladan, ale ti ko lamɔɛn, ba? Alla min ya ma yɛ ladan, ale ti fen yen, wa?

¹⁰ Ale min bi sibole doinu tɔrɔla, a si to worɔ, a ma mala kun-tigi-karagbɛlɛnu tɔrɔ, wa? Ale min bi mɔgɛ bɛɛ karanna, hɛnkili sa ale bolo, nyɛ?

¹¹ Ale Mari ya hadama-den-miriya lɔn. A ya a lɔn ko fenfen sa anu miriya rɔ fɔ ko-fuyi.

¹² Mari, ile ya mɔgɛ min nabila, wo sewani de bɛrɛbɛrɛ-wɛ-kɛ, ile ya min karan tɔn ma, kɔni.

¹³ I si a ma, wo ni a sulen tɔrɔyɛ ma ha denkɛ ni sin karagbɛlɛ wonu ye.

¹⁴ Ile Mari ti ila mɔgɛnu boloka. I ti i kan-kɔ sɔ anu na.

¹⁵ I si latelan yen kiti sa tinɛnu tɔ tun. Mɔgɔ-latelennɛ si taran telenbagayɛ rɔ.

¹⁶ Yon si sɔ n fɛ karagbɛlɛnu kan ma? Yon si n gbɛ bi ko-yogo-kɛlɛnu kan ma?

¹⁷ Ni Marila dɛnbɛnɛ ma, anu bi n bara-koe kala-a-la le nun.

¹⁸ N ya n kan mayɛlɛ, n ko, “N bi buila” kɔnɔ E, n Mari, ila hinɛ ya n nakisi.

¹⁹ N hɔnta tuma-wo-tuma, i si n nadiya ka sewɛ di n ma.

^20-21 Kiti-tɛgɛla-yogomɛ minnu bi ko-latelennɛ mala ko-radunɛ la, minnu bi yanfɛ donna mɔgɔ-nyimɛnu ma, ado anu bi mɔgɔ-magbalanɛnu faga-koe latɛgɛla, ile hayu-wo-hayu sa mɔgɛ wonu na.

²² Kɔnɔ n dogon-faran le ile Mari la. Ile nta Alla ya n nakanan.

²³ I si anuna karagbɛlɛyɛ lasɛgi anu kɔgɔ rɔ. I si anu kasara ka a tɛgɛ anu hakɛla ko ma. Ile mata Mari Alla si anu nato dogbe!