Yaburi 92 - ALLALA KUMƐ

Matɔgɔ-Bɛti Wara-Koe

¹ E, Mari, ka baraka bira i ye, wo kin dɔgɔma-ma-de! E, Alla Min Bi Fan Bɛɛ Kun Na, a kin ka bɛti bɔ ile le ye.

² A di n ye, n ni to ila keninteya-dannatɛgɛbɛliya-koe fɔla sɔgɔma-wo-sɔgɔma. Wura-wo-wura, n si to ila lanaya-koe fɔla fanan.

³ Mari, n si to i matɔgɔla bɔlɔn la ka sɔrɔn-diyamɛnu fɔ i ye.

⁴ E, Mari, ila ko-makawanɛnu si n nanyagalen. Ka a tɛgɛ i wara min ma, n si sewa-bɛti bɔ i ye.

⁵ Ila ko-ladan-bolenu makawara. I miriya-kɔrɔ ti yen muk!

⁶ Kun-takolɔn ti wo nya-yen hali! Ko-nya-yenbɛlɛ ti wo nya-yen.

⁷ Hali karagbɛlɛnu bi koloyala iko binyɛ, ado ko-yogoma-kɛlɛnu bi nanfala kubukubu, fɔ anu ba halaki pɔ

⁸ bawo ile le ye duninya mumɛ bɛɛ marala burubukai!

⁹ Mari, ma ya a lɔn serr, i yogenu fagamatoe le. I si karagbɛlɛ bɛɛ nyɛnsɛn ka anu nɔ tɛrr!

¹⁰ I wara n tagbɛlɛya gben, iko sigi-turɛ. A ara duwɛ labɔn n ma ka n nasewa.

¹¹ I wara n yogenu nɔ nya min, n bara wo yen n yɛ la. N bara karagbɛlɛnu worondo-kan lamɔɛn.

¹² Mɔgɔ-telennɛnu bara-koe si yɛlɛ fulufele, iko tin-kuri. Anu si to koloyala iko kɔlɔma-hakikɛ minnu bi Lɛbanan nyamanɛ rɔ.

¹³ Anu bara-koe ye tala yarɔ Mari Alla Bato-Bɔn la iko kɔlɔmanu bi nanfala nya min.

¹⁴ Hali anu bara kɔrɔya, anu si gbɔ iko kɔlɔma wonu. Anu nɔrɔnnɛ, ado anu tagbɛlɛyani de tolon!

¹⁵ Wo si a yira ma la ko Mari telenta. N natankalɛ wo, a radu-tina-wo-tina sa.