Yaburi 91 - ALLALA KUMƐ

Ma Lakanannɛ Alla Wara-Koe

¹ Ni min bi tala Mari wara a lakanan-koe la, ni min bi tola Alla Sɛnbɛ-Bɛɛ-Tigita latankɛ kɔrɔ,

² mɔgɛ wo si ke a fɔla Mari ye le ko, “N kumafunfannɛ anubɛ n natankalɛ le ile la. Nta Alla le ile la, n lanɛ min na, kɔni.”

³ Ale le si i latanka ko-dogonni-masibɛ bɛɛ ma. A si i lakanan saya-kirayɛ bɛɛ ma.

⁴ A si a kanbannu burun i kuma. A kanbannu si i lakanan. Ata lanayɛ, wo le ye i lakisila.

⁵ Hali mɔgɔ ma kilan masiba-koenu na suyi rɔ. Hali i ma kilan latɛrɛna-kɛlɛ la tele rɔ.

⁶ Hali i ma kilan kirayɛ la min bi i manɛgɛnna suyi rɔ. Hali i ma kilan teleta kasarɛ la.

⁷ Mɔgɔ waga yiraka-siyaman si bui i tɔnkɔn rɔ ka faga. Mɔgɔ waga tan yiraka-siyaman si faga ila foolɛ rɔ kɔnɔ ko-wo-ko ti ma ile la.

⁸ I si a rayen i nyɛrɛ yɛ la karagbɛlɛnu bi tɔrɔla nya min.

⁹ I wara Mari ma i lakanannɛ la min kɛ ka Alla Sɛnbɛ-Bɛɛ-Tigi ma i kumafunfannɛ la,

¹⁰ kasara-wo-kasara ti ke i ma tun, ado karagbɛlɛya-ko fenfen ti gbɛrɛn ila bɔn ma

¹¹ bawo Alla ye ata melikanu tola i kun na. I tara kan-bo-kan, anu si i lakanan.

¹² Anu si i kɔrɔbi anu kɔɛn la alako i kana i kian latugu kuri la.

¹³ I si ke tagamana yarɛnu tɛma. Hali duguma-fen-maralamɛnu, i si ke tagamana wonu kuma dɔfidɔfi!

¹⁴ Alla ko ale di minnu ye, a si wonu nakisi. A ko minnu ya ale lɔn Mari la, a si wonu nakanan.

¹⁵ A ko anu ba a rakele, a si a labira. Anu tenbi yakɔrɔ-mamɔɛ rɔ, a ye anu fɛ. A ko a si anu nakisi ka a ma, anu ni gbiliyɛ sɔrɔn.

¹⁶ A ko a si anu siyi-fɛ yanya ka kisi-koe yira anu na.