Yaburi 88 - ALLALA KUMƐ

Di-Kɛ-Koe Dɛnbɛn-Koe La

¹ E, n kisilɛ Mari Alla, telen-gbɛn, n bi dila n dɛnbɛn-koe rɔ. Hali suyi le tɔ, n si i rakele.

² Nta madiyali-kan lamɔɛn. I wɔlɔ matɔlɔ n di-kɛ-kan la ka n dɛnbɛ.

³ N niyi ra ara gbɛrɛn n ma kɔndɔfili bolo bawo sayɛ ara gbɛrɛn n ma.

⁴ N mani de iko minnu bara gbɛrɛn lakira-dɛ ma. Sɛnbɛ-wo-sɛnbɛ sa n na tun!

⁵ Anu bara n boloka furinu tɛma. N mani de kaka iko furi tenbi kanbɛ rɔ. I wara nyina n ko salon! N dɛnbɛn-kunya sa i bolo tun.

⁶ I wara n nakɛ-a-rɔ kaburu-soe rɔ saru! Nyɔ rapinpinɛ, ado a rayan.

⁷ I fonde bɔnɛ n kuma dɔgɔma-ma-de! Ila diminyɛ tugunnɛ n kan ma iko yi ka n bunden iko kɔrɛ.

⁸ I wara a ma, n diyana-mɔgɛ bɛɛ ara n magboya. I wara a ma, anu bara nyima n tɔ. Anu bara n balan. N ti ke tala kan-bo-kan.

⁹ N yɛ ma ara bira tɔrɔyɛ bolo. Mari, tele-wo-tele, n bi i rakelela. N bole siginɛ le i ye madiyalɛ rɔ tolon!

¹⁰ I si kabana-koenu ma furinu ye, wa? Wonu si ke anu nasɔla ka i matɔgɔ, wa?

¹¹ Anu si ila keninteya-dannatɛgɛbɛlɛ wara-koe fɔ lakira, wa? Mɔgɛnu si ila telenbagayɛ wara-koe fɔ kasara tinɛ, wa?

¹² Mɔgɛ ti ila kabana-koe yen pinpi-wɛ wo rɔ. Anu ti fenfen lɔn ila nyimayɛ rɔ kolo-gbɛ-dugu.

¹³ E, Mari, n ya i rakele n dɛnbɛn-koe la. Sɔgɔma-wo-sɔgɔma, n si i madiya.

¹⁴ Mari, nfenna i wara i ban n na? Nfenna i kan-kɔ sɔnɛ n na?

¹⁵ Kebi n dennɛ, nde ma fenfen lɔn tɔrɔyɛ kɔma, ado n bi lakira bonda-dɛ le la tolon! Nna tɔrɔyɛ ara n tabɔ.

¹⁶ Ita fondo-bɔɛ ara n tabunden kɔrr! I makilannɛ ye wuli min kɛla n kan ma, wo ye n kasarala le.

¹⁷ Telen-gbɛn, anu mininɛ n ma iko bɛ wa fa. N ba n tintan kan-bo-kan bara la, anu gbɛrɛnnɛ n ma.

¹⁸ I wara a ma, n keninte-bɛrɛbɛrɛnu bara anu masɛgi n na. N kirabɔ-nyɔgɔn sa pinpi kɔma.