Yaburi 85 - ALLALA KUMƐ

Madiyali-Kɛ-Koe Isirɛla Mɔgɛnu Sabati-Koe Rɔ

¹ E, Mari, i wara kinikini ila nyamanɛ ma nun. I wara a ma, Isirɛla mɔgɛnu bara sabati tun!

² I wara ila mɔgɛnu hakɛ makoto. I wara ila mɔgɛnuna ko-yogomɛ bɛɛ yamatogon.

³ I ya i fara diminyala anu ma. I ya a ma, ita diminya-belebele ma kɛ anu ma.

⁴ E, ma kisilɛ Alla, i ni ma lasɛgi i ma tun! I fara i fonde bɔla ma kuma.

⁵ I fondo-bɔnɛ si to ma kuma tɛban, wa? I fondo-bɔnɛ si to ma kuma ha ma kegeyɛnuta wati, wa?

⁶ I ti ma lakuraya tun alako male, ita mɔgɛnu ni i matɔgɔ?

⁷ E, Mari, ila keninteya-dannatɛgɛbɛlɛ yira ma la. I ni ma lakisi.

⁸ N tole masɔnɛ alako n ni a lɔn ile Mari Alla ye nala min fɔla. I ya lanyiri kiri male ita mɔgɛnu ye ko ma si to yisi-kimɛ rɔ. Alako tun, ma kana ma lasɛgi mala kun-takolonya-koe wonu ma tun.

⁹ I rabɛnnɛ i gbiliyalɛnu kisi-koe rɔ yati, alako ita gbiliyɛ kana dasa mala nyamanɛ rɔ.

¹⁰ Keninteyɛ anubɛ lanayɛ si bɛn ka anu nyɔgɔn kɔndɔn. Telenbagayɛ anubɛ yisi-kimɛ si anu nyɔgɔn tamɔnsɔn diyanayɛ bolo.

¹¹ Isirɛla mɔgɛnuta lanayɛ si ke Alla ma. Alla min telennɛ Isirɛla ye, wo si duninya mafɛlɛn ka bɔ a warɛ san ma.

¹² Mari si ma lasabati, ado mala duginu si nɔrɔn ki-fannu kɔrɔ.

¹³ Mari tenbi tala kan-bo-kan, telenbagayɛ ye tala a yarɔ nyɔ ka ta kilɛ lakala a ye.