Yaburi 84 - ALLALA KUMƐ

Ta-Koe Bato-Bɔn la Sewɛ Rɔ

¹ E, Mari Sɛnbɛ-Bɛɛ-Tigi, i Bato-Bɔn di n ye kosɛbɛ!

² Nyɔ-sɔgɔ-bɛrɛbɛrɛ ye n na. A di n ye n ni to i Bato-Bɔn la dɛɛ! N bara n fanka ban sigi-sɛ la ile Alla-nimɛ ye.

³ Hali nananu bi anu nyagan sala ita saraka-mintan-tinɛ dafɛ. Anu bara le nyɔ la. Anu bi anuna dan sɔrɔnna nyɔ le. Mari Sɛnbɛ-Bɛɛ-Tigi le ile la, nta mansɛ anubɛ nta Alla, kɔni.

⁴ Minnu siginɛ i Bato-Bɔn la, wonu sewanɛ dɔgɔma-ma-de! Anu bi i matɔgɔla tolon!

⁵ Minnu ya sɛnbɛ sɔrɔn i bolo, wonu sewanɛ kati! Anu sewanɛ le ye tala Yerusalɛm kɔnkɔ-sɛnimɛ kuma.

⁶ Baka lɛɛ min tagbalanɛ todo, anu ba tenbi nyɔ rɔ, Alla si nyɔ ma tenke gbansan na anu ye. Banda-yi kun-fɔlɛ si belenna sigila a rɔ ka nyɔ ma baraka tinɛ la.

⁷ Anu tenbi tagama wo kun na, anutɛ ye tola gbɛlɛyala le bawo a sɔgɛ ye anu na ka ta anu nyɛrɛ latenbi allanuta Alla ma Bato-Bɔn la.

⁸ E, Mari Alla Sɛnbɛ-Bɛɛ-Tigi, i ni mata madiyali-kan lamɔɛn. E, Yakobata Alla, i wɔlɔ matɔlɔ ma kan la.

⁹ E, Alla, ita duwɛ layigi mala mansɛ kuma min si ma lakanan. Duwɛ layigi ale mansɛ kuma, ile nyɛrɛ ya min yabɔ.

¹⁰ Ka tele kelan bɔ i Bato-Bɔn la, wo fisa tele waga kelan ko kan-tina-gbɛrɛ. Yanni n ni to siginɛ karagbɛlɛnuna bɔn la, a fisa, n ni to sɔni ile nta Alla Bato-Bɔn don-dɛ la.

¹¹ Ma latankalɛ le Mari la, ado mala gbiliya-mansɛ le. Ala duwɛ ye ma fɛ ka kinikinɛ anubɛ gbiliyɛ di ma ma. A ti ko-nyimɛ bɔ mɔgɔ-telennɛ telen tɔ.

¹² E, Mari Sɛnbɛ-Bɛɛ-Tigi, minnu lanɛ i la, wonu sewani de!