Yaburi 79 - ALLALA KUMƐ

Madiyali-Kɛ-Koe Nyamanɛ Kunka-Koe La

¹ E, Alla, minnu ma i lɔn, wonu buira ita nyamanita-mɔgɛnu ma ha anu ya ila Bato-Bɔn latinya. Anu bara Yerusalɛm-mayɛlɛnnɛ to iko sundu-kunyɛ.

² Anu ya ila mɔgɛnu furi-bolokanɛ to belenna dogɛnu kɔrɔ. Minnu bi wɔlila i ye, wonu suyi tora sani sogenu kɔrɔ.

³ Anu ya a ma, ila mɔgɛnu yele tora yigila iko yi. Yele yigira Yerusalɛm kan tinɛ bɛɛ rɔ iko gboron-gboronna yi. Mɔgɔ-wo-mɔgɔ ma to a niyi la min si anu togon.

⁴ Sibolo-gbɛrɛ minnu bi mala foolɛ rɔ, wonu bi ma mɔɛnna. Anu bi yɛlɛnna ma ma ka ma manyini.

⁵ Mari, i fondo-bɔnɛ si to ma kuma tolon, wa? I fonde si to bɔni ma kan ma iko tɛ tenbi kikɔlɛ la, wa?

⁶ I yandi, ila fondo-bɔɛ wo telen i batobɛlɛnu denu na. I ni diminya i madiyabɛlɛnu ma.

⁷ Bawo wonu denu nyɛrɛ-nyɛrɛ ya ita mɔgɛnu faga. Wonu denu bi ila nyamanɛ tinya tinɛ nun.

⁸ I kana ma bira ma benbanu hakɛ yili la. Kinikini ma ma ka! Ma yigi ara tɛgɛ gbati!

⁹ E, Alla, ma dɛnbɛ. I ni ma lakisi. I ni ma lakanan. I ni ma makoto ka a tɛgɛ i nyɛrɛta gbiliyɛla ko ma.

¹⁰ Nfenna sibole doinu bi ma manyinikala ko mata Alla ye mintɔ? Sibolo-gbɛrɛ minnu bara ita mɔgɛnu faga, a ma, ma ni i yen wonu fagala.

¹¹ I wɔlɔ matɔlɔ mɔgɔ-biranɛnu kurun-kan la. Minnu faga-koe la ara tɛgɛ, wonu kunyɛ bɔ lakira bonda-dɛ la i sɛnbɛ-makawanɛ la.

¹² E, n tigi, sibolo-gbɛrɛ minnu bara i manyini, i tayili sara wonu na iko wɔrɔnfila.

¹³ Wo wa ka-a-la, ita mɔgɛ ye male min na, ila sagɛnu, kɔni, ma si baraka bira i ye burubukai! Mabɛ ma kegeyɛ si to i batola habadan!