Biblia Todo Logo
Bìoball air-loidhne

- Sanasan -

Yaburi 77 - ALLALA KUMƐ


Yisi-Kimɛ Di-Koe Mɔgɔ-Tɔrɔnɛ Ma

1 N bi dila Alla dala. N ba di a dala, a si a lamɔɛn.

2 N tenbi tɔrɔyɛ rɔ, n bi n tigi matarala. Ki-kudu, n bole siginɛ Alla ye ka a madiya kɔnɔ n sa yisi-kima sɔrɔnna.

3 N ba n miri Alla ma, fɔ di-kɛ-sumɛ si sigi n ma. N ba n miri a ma wɛ kɛ, fɔ n si ma kɔrɔn!

4 A ye a mala, kinɔgɔ ti sa n yɛ ma. Yisi-tinya ara n tade don!

5 N sa n mirila tele-tenbinɛnu dɔrɔn ma de kɔnɔ n bi n mirila san-tenbinɛnu fanan ma.

6 N bi kila n mirila kudu! N tenbi miri kɛ kun na, n bi n nyɛrɛ manyinikala.

7 N ko, “N tigi si to a banna le ma la, wa? Ma wara-koe ti a hɛnɛ tun, ba?

8 A ara a ban keninteyɛ yirala ma la le, wa? A sa ala lanyiri kanbalila ma ye tun, ba?

9 Alla ara a ban kinikinina ma ma le, wa? Ala fondo-bɔɛ ara ala hinanteyɛ-gbɛ bi ma bolo le, wa?”

10 Wo kɔma, n ya a fɔ ko, “Alla Min Bi Fan Bɛɛ Kun Na, wo ya ata fanka mayira kɔrɔma la nya min, a sa a mala wo nya tun, ado wo ye n yisi tɔrɔla.”

11 Mari, n yili ye ila wɔli-nyimɛnu ko. I wara ko-makawanɛ minnu kɛ kɔrɔma la, n hɛnkili ye wonu dama ko.

12 I wara min bɛɛ kɛ, n bi n mirila wonu ma. N bi n hɛnkili lamirila ila kabana-koenu ma.

13 E, Alla, i wara min bɛɛ kɛ, wo bɛɛ sɛnima. Ile Alla makawara ka tenbi bɛsɛ bɛɛ la.

14 Ile le ye Alla wo la min si kabana-koenu kɛ. I ya i nyɛrɛta sɛnbɛ yira sibolo-gbɛrɛnu na.

15 I ya ila mɔgɛnu kisi ila sɛnbɛ-wɛ la, Yakoba anubɛ Yusufu kegeyɛnu, kɔni.

16 E, Alla, kɔgɔ-yi wa i yen, wo fanan si kilan i la. Kɔgɔ-yi-tungban si yɛrɛyɛrɛn iko mɔgɛ si yɛrɛyɛrɛn kilan bolo i kɔrɔ nya min.

17 Banda-finyɛ ya a dɛ bɔ a kɔrɔ. San sɛrɛnta iko kalabɛn. Banda-nyin-masɔgɛ ya waan raka belenna.

18 Ila san-sɛrɛn-kan ye bɔla iko mɔgɛ tenbi durɔmu-takolɔn makuru-kurunna. Ila banda-nyin-masɔgɛ ye malanna duninya kuma. Dugi nyɛrɛ ye yɛrɛyɛrɛnna.

19 Kilɛ sanɛ i bolo kɔgɔ-yi-dumɛ tɛma kɔnɔ mɔgɔ-wo-mɔgɔ ti i kin-gbɛ yen.

20 I ye ila mɔgɛnu yarɔ iko saga-kandannɛ. Musa anubɛ Aruna ye anu kun na.

Kuranko Common Language Bible © The Bible Society in Sierra Leone, 2006.

Bible Society in Sierra Leone
Lean sinn:



Sanasan