Yaburi 76 - ALLALA KUMƐ

Allata Nɔlɛ Wara-Koe

¹ Alla mankan kolo Yuda nyamanɛ rɔ. Anu bi a gbiliyala Isirɛla nyamanɛ rɔ kosɛbɛ!

² Bɔn ye a bolo Yerusalɛm soe burɔ. A si a mayigi ala kɔnkɔ-sɛnimɛ kuma nyɔ le.

³ A si a yogenuta kalabɛn anubɛ faannu takerikeri nyɔ le. A si anuna kɛlɛ-kɛ-fan bɛɛ tinya pɔ!

⁴ E, Alla, i gbiliyanɛ kati! I bɔnɛ i yogenu nɔ tinɛ kɔnkɛnu tɔ tumɛ min, i ya ila mansayɛ mayira mɔgɛnu na.

⁵ Wo ya a ma, anuna kɛlɛ-kurugbɛnu bara foo anu bolo-fan bɛɛ la. Wonu sanɛ anuna kinɔgɔ-laban rɔ, ado anuna sɛnbɛ anubɛ anuna kusanyɛ bɛɛ ara ma fuyi la.

⁶ Ile Yakobata Alla ya anu makilan nya min wo, anuna kirindi-laburilɛnu anubɛ anuna soeenu fagara anu gbɛ wo le tɔ.

⁷ Bɛɛ kilannɛ ile Mari la. Mɔgɔ-wo-mɔgɔ ti a sɔ i fonde bɔnɛ yarɔ.

⁸ I wara ban kiti tɛgɛla ka bɔ Arinyɛni tɔ tumɛ min, duninya-mɔgɛnu kilanta ka a sigi-a-la don!

⁹ I mara kiti-tɛgɛlɛ la min kɛ, i ya yo di mɔgɔ-tɔrɔnɛnu ma ka anu dama kisi.

¹⁰ Hali mɔgɛnuna diminyɛ, a laban si ma ile Mari ye gbiliyɛ la. Minnu kunyɛ ma to kɛlɛ rɔ, wonu si anu taya ka ladiyɛ bɛɛ kɛ i gbiliya-koe rɔ a kilɛ fɛ.

¹¹ Ni i ya min di-koe fɔ ita Mari Alla ma, i ni wo di a ma. Wole sibolo-gbɛrɛ minnu gbɛrɛnnɛ Isirɛla ma, wo ni na kɔ-fannu na a ye. Alla ye a mala, mɔgɛ bɛɛ ye kilanna a la.

¹² A ye kun-tigi-wasinɛnu famayigila. A ye mansa-makawanɛnu kumakɔla.