Yaburi 74 - ALLALA KUMƐ

Nyamanɛ Kunka-Koe Madiyalɛ

¹ E, Alla, nfen ya a to, i wara i ban ma la ka? Ile si diminya ila mɔgɛnu ma ka le tolon, ba?

² I wara ita mɔgɛ minnu yabɔ i nyɛrɛ ye bi-ko-ma, i miri anu ma, i ya minnu kunyɛ bɔ yɔɔnyɛ rɔ ka anu ma i halala mɔgɛnu na, kɔni. I miri Yerusalɛm soe ma i mayiginɛ kan min nun.

³ I ni so-kasaranɛ kɛ ratagama. I kolan lata Bato-Bon-mirannu tinya-nya ma ma yogenu bolo.

⁴ A lawɔyɔ-nya mafɛlɛn de i yogenu bolo i Bato-Bɔn la. Anu bi a fɔla ko anu bara nɔ-ko sɔrɔn. Anu ya anuna falafalɛnu layɛlɛ san ma min si a yira ma la ko anu bara nɔ-ko sɔrɔn ma ma.

⁵ Anu mani de iko kɔn-tɛgɛla-nyananu minnu bi gbɔngbɔn makerila anuna tɛgɛrannu na.

⁶ Kɔlɔma-malɛsɛnɛ minnu bi Bato-Bɔn la, anu ya wo bɛɛ tinya anuna tɛgɛran anubɛ anuna kundu-wɛnu na.

⁷ Wo kɔma, anu ya i Bato-Bɔn tinya ka tɛ tugu a la. Mɔgɛnu bi i batola kan tinɛ wo min tɔ, anu bara nyɔ latinya.

⁸ Anu bi ma rasirindi-koe le tɔ nun. Kan-tina-sɛnima min bɛɛsi ye mala nyamanɛ rɔ, anu bara wo bɛɛsi mintan gburr!

⁹ Mala kabana-ko-tamasere bɛɛ ara tunu don! Hali mala nɛbinu, anu ma anu to anu kɔma, ado mɔgɔ ma kɛ laban-wati lɔn.

¹⁰ E, Alla, ma yogenu si to yɛlɛnna i ma ha tumɛ nyamintan? Anu si to i mamɔɛnna le, wa?

¹¹ Nfenna i wara i kɔɛn bɔ ma wara-koe rɔ. Nfenna i wara i kɔɛn madon i la?

¹² E, Alla, kebi fɔlɔ, ile ye mansayɛ la ma kun na. I wara ma latanka siyaman kɛ duninya kɛ rɔ.

¹³ I ya yi fara fila la i sɛnbɛ-makawanɛ la. Ninkinankɛ min tɔgɛ Lifayatan, i wara wo kunyɛnu tatii pɔ!

¹⁴ I ban wo kunyɛnu tatiila, i ya a lakɛ wularɔ-sogenu kɔrɔ.

¹⁵ I ya a ma, yi-nɛnu anubɛ tenkenu tugura a rɔ. I ya bɛnu gbala anu worɔn la todo!

¹⁶ I ya suyi anubɛ tele dan. I ya tele anubɛ karɛ sigi anu sigi tinɛnu tɔ.

¹⁷ I ya dugi dan tɛgɛ. I ya samɛ anubɛ telemɛ dan.

¹⁸ Kɔnɔ Mari, i miri, i yogenu bi yɛlɛnna i ma. Alla-lɔnbɛlɛnu denu bi ile Alla rasɛla.

¹⁹ I kana i ban ita mɔgɛnu na ka anu don anu yogenu bolo. I kana nyina ila mɔgɔ-tɔrɔnɛnu ko.

²⁰ Wobɛ ita mɔgɛnu sarata kumɛ min ma wo nyɔgɔn tɛma, i miri wo ma. Karagbɛlɛyɛ ye dogɔn rɔ belenna nyamanɛ bɛɛ rɔ.

²¹ I kana a ma, male mɔgɔ-tɔrɔnɛnu ni miliya. I ni a ma, bolo-kolɔnnu anubɛ fɛlɛtenɛnu ni i tanto.

²² E, Alla, i lakɔɛnma, i ni i yoe yira anu na. I ni a lɔn yati, ko Alla-lɔnbɛlɛnu bi ile Alla lafɛyala tele-wo-tele.

²³ Anu bi seren-serenna nya min, i kana nyina wo ko. I yogenu bi kuma-gbondanɛnu fɔla i ma tolon!