Yaburi 73 - ALLALA KUMƐ

Allata Telenbagayɛ Wara-Koe

¹ Alla nyimayanɛ Isirɛla mɔgɛnu ye, katarala yisi-sɛninyani-tiginu ma.

^2-3 N ya a yen min kɛ, karagbɛlɛnu wara-koe ye tala yarɔ, n ya anu makeliya. A tora doni, lanayɛ ni bɔ n bolo. Fɛda, nna dɛnkɛninyɛ, wo tara le.

⁴ Duma sa sigila karagbɛlɛnu ma. Anu tagbɛlɛ, ado anu kɛndɛ.

⁵ Anu sa tɔrɔla iko mɔgɛ doinu. Anuna tɔrɛ mani ma iko mɔgɛ doinutɛ.

⁶ Woletɔ anu bi wasinteyɛ donna anu kan na iko kanna-fan. Anu bi karagbɛlɛyɛ donna anu ma iko duruku-ba.

⁷ Wunduyogoyɛ ye tugula anu yisi rɔ iko yi. Anu kunyɛ lafanɛ yanfanteyɛ la.

⁸ Fenfen sa anu da rɔ fɔ manyinɛ anubɛ darɔ-gboyɛ. Anu wasira dɔgɔma-ma-de! Anu si yanfɛ kiri mɔgɛ doinu ma ka anu takilan-kumɛnu fɔ.

⁹ Alla min bi san-kole rɔ, anu bi kuma-yogomɛnu fɔla wo ma. Anu bi mɔgɛnu sɔla fɔrɔsɛ la duninya kɛ rɔ.

¹⁰ Hali Allata mɔgɛnu, wonu bi anu tole masɔla anu na. Anu ya kuma-wo-kuma fɔ, wonu si la wo la tiriya!

¹¹ Anu kɛnɛna a fɔla ko, “Alla ti kɛ lɔn. Alla ti kɛ fɛ gbɛ!”

¹² Karagbɛlɛnu bi wo nya na le. Fen bi anu bolo duk, ado a ye tola sala a kuma tun!

¹³ N bara n nyɛrɛ mara fu! Nfen ya a ma worɔ, nde ma hakɛ kɛ?

¹⁴ E, Alla, i wara a ma, n bi tɔrɔla tele-wo-tele. I ye n tagbesila sɔgɔma-wo-sɔgɔma.

¹⁵ Ni nde kumara iko karagbɛlɛ kɛnu kumara nya min, wo si a ma nun, n ti ma iko Allala mɔgɛ.

¹⁶ N ya n miri kɔndɔfili kɛ ma kɔnɔ a gbɛlɛ n kuma.

¹⁷ Fɔ nna tɛ i Bato-Bɔn la, n nara to a lɔnna min bi nala mala karagbɛlɛnu na.

¹⁸ I si ta anu sɔ kila-namanɛ la alako anu ni bui kasarɛ rɔ.

¹⁹ Anu si halaki tiriya! Anu na si to kumakɔɛ bolo.

²⁰ Anu bara-koe si ma iko mɔgɛ wa kiyo-makilannɛ sa, a wa kunden gbɛ, a ti ma tonya la. Ile, ma tigi wa kunden tumɛ min, ma yogenu bara-koe ara ka-a-la.

²¹ N miriya-yogoyanɛ i tɔgɛ rɔ tumɛ min, n burɛ lafanɛ keliyɛ la,

²² n mani de wo wati rɔ iko soge. N ma ile Mari lɔn.

²³ Hali wo, n gbɛrɛnnɛ i ma tolon! N bolo biranɛ i bolo.

²⁴ I ye n nabila-kilɛnu sala n kɔrɔ. Tɔ-a-la, i si n matɔgɔ ka n sɛnibɔ Arinyɛni tɔ.

²⁵ Fenfen sa nde bolo Arinyɛni tɔ ile kɔma n dɛnbɛn-koe rɔ. N bi nyinina nfen ma duninya kɛ rɔ ile Alla kɔma?

²⁶ Hali n miriya anubɛ n fɛrɛ ra ye tola fagala n ma kɔnɔ ile Alla si to sɛnbɛ dila n ma. N sa nyinina fenfen ma ile Alla kɔma habadan!

²⁷ Mɔgɔ-wo-mɔgɔ ya a masɛgi ile la, wo tigi si tɔrɔ, yɔ! Ni mɔgɔ-wo-mɔgɔ ma a telen i ye, i si wo tigi halaki.

²⁸ Ni ndetɛ le, a fisa, mɔgɔ ni a gbɛrɛn Alla ma. Nde ara a ma, n tigi Mari ni n nakanan ka to ala kɛwɔli-nyimɛnu takaranna mɔgɛnu ye, wo fanan di n ye.