Yaburi 69 - ALLALA KUMƐ

Dɛnbɛn-Ko-Madiyalɛ

¹ E, Alla, n kisi. Yi ara n bira n kan la.

² N bi tununa bore rɔ min kuri bɔnɛ a la. N bi kɔgɔ-yi-dumɛ tɛma. Yi ye tugi min kɛla a rɔ, wo ye n faga tinɛ le.

³ N bara bandan dila n dɛnbɛn-koe rɔ. N kan la ara sa diyi kɛ bolo. N yɛ ma ara gbala kila-mafɛlan rɔ n dɛnbɛn-koe la kasa!

⁴ N sɔgɔ labɔnɛ minnu na, n ma ko ma minnu na, wonu siya n kun-sigi ko. N yogenu bi tɔgɛ sala n na. Anu tagbɛlɛ n ko, ado n faga-sɔgɛ ye anu na. N ma fan minnu bi, anu bi n fɔrɔsɛla ko n ni wonu nasɛgi.

⁵ E, Alla, n hakɛnu dogonni ma ile ma. Ile ma fili nna kuntanyɛ ma.

⁶ I yandi, a ma, n kana yarabiyi lana ila mɔgɛnu ma. Anu lanɛ n tigi Mari Sɛnbɛ-Bɛɛ-Tigi Alla kelen pe le la. I yandi, a ma, n kana i batolɛnu namiliya. Isirɛlata Alla le ile la.

⁷ Anu bara n mamɔɛn ilela ko la. N bara miliya dɔgɔma-ma-de!

⁸ N gboyanɛ n na-kelen-nyɔgɛnu ye iko mɔgɔ-gbɛrɛ. N bara ma nna denbayɛnu yala iko sundan.

⁹ N bi miriya-nyima min telenna i Bato-Bɔn la, wo mani de iko tɛ le ye n mintanna n yisi rɔ. Anu bi mɔɛn-kumɛ minnu natala i ma, wo ye sɛgila nde le ma.

¹⁰ N bi n famayigila i ye ka sunyɛ don kɔnɔ hali wo, mɔgɛnu bi n mamɔɛnna.

¹¹ N bi n makirila diyi-kɛ-kurɛnu na kɔnɔ anu bi n mayɛlɛnna.

¹² Anu bi n bara-koenu takaranna luyinu ma, ado gbɛɛtoenu bi n mayɛlɛn-siginu sala.

¹³ Kɔnɔ wo bɛɛ rɔ, n Mari, n bi ile le madiyala. E, Alla, n yabi a tumɛ rɔ. I ni n yabi ka a tɛgɛ ila hinɛ ma bawo i ye ila lanyiri latɔnbagayala ka mɔgɛ kisi.

¹⁴ N kisi alako n kana tunu bore rɔ. I ni n natanka n yogenu ma. N bɔ kɔgɔ-yi dumɛ rɔ.

¹⁵ A ma, yi kana tugu n kun na. I kana a ma, n ni to dumɛ kɛ rɔ. N kana yigi lakira.

¹⁶ E, Mari, n yabi a nyimɛ la ila keninteya-dannatɛgɛbɛlɛ rɔ. I ya-lamunun n na ka a tɛgɛ ila kinikini-wɛ ma.

¹⁷ I kana i dogon nde, ila wɔli-kɛlɛ kɔrɔ. N bi tɔrɔya-belebele le tɔ kɛ. Fɔ i wa n dɛnbɛ.

¹⁸ Na n bara ka n kisi. N natanka n yogenu ma.

¹⁹ I wara n mɔɛn-nya yen anu bolo. Anu bi n yarabila nya min, i wara wo fanan yen. I kolan bɛnnɛ n yoge bɛɛ ma.

²⁰ Anu bi n mamɔɛnna nya min, wo ara n yisi tinya pɔ, ado wo ara a ma, n yigi ara tɛgɛ gbati! N ya a lɔn nun ko do si hina n na nun kɔnɔ n ma mɔgɔ-den-kelen yen min si hina n na anu tɔ.

²¹ Kɔnkɛ ye n na tumɛ min, anu ya mɔgɔ-faga-fan le di n ma. N kan lagbalata wati min, anu ya kotuli le di n ma.

²² Anu tenbi fen dɔn kun na ladiyɛ rɔ, alamɛ ladiyɛ mara anu tabunden-fan la. Anu tenbi saraka-bɔɛ la, alamɛ wo mara anu bui-kunya la.

²³ Alamɛ anu fiyonyara. Alamɛ anu tora yɛrɛyɛrɛnna anu kin kun na.

²⁴ Alamɛ i ya ila fondo-labɔɛ labɔn anu ma. Alamɛ ila diminyɛ ya anu gben ka digin anu ma.

²⁵ Alamɛ anuna dagɛ rakolonyara filili! I ni a ma, mɔgɔ-wo-mɔgɔ kana to a niyi la anuna fani-bɔnnu na.

²⁶ Ile ya min tɔrɔ, anu denu fanan bi sɛgila wulila wo kan ma tun. Ile ya min tanban, anu fanan bi sɛgila do sala wo kuma.

²⁷ I yandi, anu hakɛ sɛbɛ. I ni anu namara. A ma, hali kisi-ko-kundunɛ, anu kana a sɔrɔn i bolo.

²⁸ Anu tɔgɛ bɔ nimaya-kɛdi rɔ. Anu tɔgɛ kana taran ila mɔgɔ-telennɛnu tɔgɛ tɛma.

²⁹ N bi dumɛ anubɛ yigi-tɛgɛ le kun na. E, Alla, n sɔ kan-tina-latankanɛ rɔ.

³⁰ N si i tanto-bɛti bɔ. N si ita sɛnbɛ wara-koe fɔ baraka-bɔɛ la n bolo.

³¹ Wo si diya i ye ka tenbi ninki-sarakɛnu na hali ka tenbi tura-sansinɛ la.

³² Ni mɔgɔ-tɔrɔnɛnu ya a yen ko Alla ara n nakanan, anu si sewa. Wo si a ma, Alla-batolɛnu kɔntɔ ni diya.

³³ Mari si a wɔlɔ matɔlɔ makolamɛnu na, ado ala mɔgɛ minnu bi yele la, a ti nyina wonu ko.

³⁴ Alamɛ duninyama-fan bɛɛ ya ale Alla tanto hali minnu bi kɔgɔ-yi tɛma.

³⁵ A si Yerusalɛm lakisi ka so-nɛnu sɔ-kura-kɛ tun Yuda nyamanɛ rɔ. Ata mɔgɛnu si sigi nyɔnu tɔ ka nyamanɛ wo bi.

³⁶ Nyɔ si ma a batolɛnu kegeyɛ halalɛ la. A kenintenu denu si sigi nyɔ.