Yaburi 66 - ALLALA KUMƐ

Baraka-Birɛ anubɛ Tantoli-Bɛti

¹ Mɔgɛ bɛɛ ni a lawɔyɔ ka Alla tanto.

² Wo ni Allata sigi sa ka a tɔgɛ gbiliya. Wo ni gbiliya-ba di a ma.

³ Wo ni a fɔ Alla ye ko a ya koe minnu kɛ, wonu makawara. A sɛnbɛ makawanɛ ha wo ya a ma, a yogenu tora sani a kɔrɔ kumakɔɛ bolo.

⁴ A fɔ a ye fanan ko duninya-mɔgɛ bɛɛ ye a batola. Anu bi tantoli-bɛtinu bɔla a ye ka a tɔgɛ tanto fanan.

⁵ Wo na, wo ni a yen Alla ara min ma. A ara min kɛ hadama-dannu tɛma, wo makawara.

⁶ A ya kɔgɔ-yi gbala a worɔn la ha ma benbanu banta tenbila. Anu ke yi kɔgɔma, anu sewara dɔgɔma-ma-de bawo Mari ara min kɛ anu ye.

⁷ A ye ala sɛnbɛ labɔla ka ma mara tolon! A ye a kolan sala sibole bɛɛ fɛ. Min murutiyanɛ Alla ma, wonu kana anu nyɛrɛ lɔn sɛnbɛ-tigi la.

⁸ Sibole bɛɛ ni mata Alla tanto. Mɔgɛ bɛɛ ni ala kabana-koe wara-koe lamɔɛn.

⁹ A ara ma to ma niyi la. A ma sɔn ma kasara-koe ma.

¹⁰ E, Alla, iko wodi-gbɛ si sɛninya tɛ la nya min, i wara ma rafɛ wo nya na le.

¹¹ I sɔnta, ma ni bira ma yogenuna gbɛrɛ la ka dunu-belebele sigi ma kuma.

¹² I ya a ma, ma yogenu ya ma ratɛntɛn anu kian la. Ma tɔrɔta nun iko mɔgɛ min bi tɔrɔya-dagɛ rɔ. Kɔnɔ kaka gbɛ, i wara na ma la ma lafɛrɛ tinɛ.

¹³ N si na saraka-mintantɛnu na i Bato-Bɔn la. N ya lanyiri kiri i kɔ koe min na, n si wo labɔ.

¹⁴ N bi tɔrɔyɛ rɔ tumɛ min, n ya lanyiri kiri i ye min di-koe rɔ i ma, n si wo di i ma.

¹⁵ N si sagɛnu ma saraka-mintantɛ la. N si turɛnu anubɛ baa-kɔrɔnnu ma saraka-mintantɛ la alako wonu sisi ni yɛlɛ san ma i ye.

¹⁶ Wole minnu si Alla gbiliya, wo na wo tole masɔ. A ara min kɛ n ye, n si wo rakaran wo ye.

¹⁷ N dira a dala n dɛnbɛn-koe la. Wo kɔma, n ya a matɔgɔ bɛtinu na.

¹⁸ Ni n ma nna ko-yogomɛnu nabɔ gbɛ rɔ n tigi ye nun, a ti a wɔlɔ matɔlɔ n na nun muk!

¹⁹ Kɔnɔ Alla ya n kan lamɔɛn ka a wɔlɔ matɔlɔ nta madiyali-kan la.

²⁰ N si Alla tanto bawo a ma a ban nta madiyalɛ la. Wo kɔma, a ma n bɛn ala hinɛ rɔ.