Yaburi 65 - ALLALA KUMƐ

Tantolɛ anubɛ Baraka-Bira-Koe

¹ E, Alla, a bɛnnɛ, ma ni i tanto Yerusalɛm soe burɔ ka mata lanyirinu natɔnbagaya i ye

² bawo i ye mala madiyalɛnu namɔɛnna. Bɛɛ si na i wara

³ ka a tɛgɛ anu hakɛnuna ko ma. Ma hakɛnu ba nɔ-ko sɔrɔn ma ma, i si ma makoto.

⁴ Ile Alla ye mɔgɛ min yabɔla ko a ni a sigi ila Bato-Bɔn la, mɔgɔ-sewanɛ le mɔgɛ wo la. Ko-nyimɛ minnu bi i Bato-Bon-sɛnimɛ la, wonu denu si ma hɛnɛ.

⁵ Ma ya a lɔn ko i ye mala madiyalɛnu yabila bawo ma ye nɔlɛ sɔrɔnna ma yogenu kuma. I ye kabana-koenu nadanna ma ye alako ma si kisi nya min. Duninya-mɔgɛ bɛɛ lanɛ ile la, hali minnu bi kɔgɔ-yi kɔma.

⁶ Ita sɛnbɛ ya kɔnkɛnu sigi anu gbɛnu tɔ yiri! Wo le ye a yirala ko ita sɛnbɛ kolo.

⁷ Kɔgɔ-yi tugun-kan a rɔ, i si wo rade don! Hali sibolo-gbɛrɛnu kurun-kan, i si wo fanan tade don!

⁸ I wara kabana-koe minnu kɛ, duninya bɛɛ kawanɛ wonu ma. Ka a bi duninya tɔnkɔn doi ma ka a sigi a tɔnkɔn doi la, i ye mɔgɛnu nasewala.

⁹ I ye dugi fɛ-birala bandɛ la. I ye a mala, mala dugi ye nɔrɔnna sɛnita-fannu kɔrɔ kati! I ye yi-worɔnnu nafala yi la. I ye duninya lafala ki-fannu na.

¹⁰ I ye bandɛ lanala mala sɛni-wɔrɔnɛnu tɔ alako anu yi ni kɛ. I ye dugi lamola banda-yi la alako ki-fannu ni fɛrɛn.

¹¹ Ila nyimayɛ si a ma, ma ni dɔn-fen-siyaman sɔrɔn. Ila duwɛ taranta kan-bo-kan, dɔn-fan si taran nyɔ duk!

¹² I wara a ma, kolo-fannu siyayara ka anu de-nyini tinɛ lafa pen! Kolo-fen-siyamɛ ara a ma, sewɛ ara na.

¹³ Gbɛkolenu nafanɛ sagɛnu na, ado mala sɛni sa tinɛnu na ara fa fui-fannu na. Wo bɛɛ mara sewɛ anubɛ lɛnkɛ-gbesi la ma bolo.