Yaburi 63 - ALLALA KUMƐ

Alla Taran-Ko-Sɔgɛ ye N Na

¹ E, Alla, nta Alla le ile la n si min bato. N bi surula i nyinina. I sɔgɛ ye n sɔndɔmɛ la. I sɔgɛ ye n fɛrɛ mumɛ la iko dugu-gbalanɛ ye nyinina yi ma nya min.

² I yen-sɔgɛ ye n na ila Bato-Bɔn la. Ila sɛnbɛ anubɛ ila gbiliyɛ yen-sɔgɛ ye n na.

³ Ila hinɛ wo fisa n ye niyi nyɛrɛ ko. Woletɔ n si i tanto.

⁴ Fananta n bi n niyi la, n bi i tantola dɛɛ! N si n bole sigi i ye madiyali-kɛ tinɛ.

⁵ N sɔndɔmɛ la si fa iko mɔgɔ wa fa ladiyɛ kuma. N si sewa-bɛtinu bɔ i ye ka i tanto wonu na.

⁶ N tenbi sani, n hɛnkili ye i ko. Ki kudu, n bi n mirila i ma

⁷ bawo i wara n dɛnbɛ kati! N tenbi i kanban-ninɛ la, n si siginu sa i ye.

⁸ N ba i kɔɛn bira n bole la, wo si n natanka.

⁹ N faga-sɔgɛ ye mɔgɛ minnu na, wonu si taran lakira.

¹⁰ Anu kunyɛ si to kɛlɛ rɔ, ado sulukinu si anu furinu dɔn.

¹¹ Wo kɔma, mansɛ si nyagalen bawo Alla ara nɔlɛ di a ma. Minnu telennɛ Alla ye, wonu si a tanto kɔnɔ foninya-fɔlɛnu si a sigi-a-la don!