Yaburi 62 - ALLALA KUMƐ

Lanayɛ Sa-Koe Allata Latanka-Koe Rɔ

¹ N si a bira n tɔ ha Alla ni n kisi. N lara ale kelen pe le la.

² Ale le kelen pe si n natanka ka n kisi. N kisi-tinɛ le ale la. Mɔgɔ-wo-mɔgɔ ti n nɔ.

³ Wole, n yogenu, wo si to mɔgɛ kan ma ha tumɛ nyamintan, mɔgɛ minta ma gbɛlɛ ka kɛ yasa-kore rɔ, kɔni?

⁴ Wole, a yogenu bi nyɔ dɔrɔn ka a mankan layigi. Foninyɛ di wo ye. Hali wo ye duwala kɔnɔ wo ye dankali-kɛla wo yisi rɔ.

⁵ N yɛ bɛnnɛ ale Alla kelen pe le ma. N yigi bɛɛ sanɛ ale le tɔ.

⁶ Ale le kelen pe si n natanka ka n kisi. N kisi-tinɛ le ale la. Mɔgɔ-wo-mɔgɔ ti n nɔ.

⁷ Nna kisi-koe anubɛ nna gbiliyɛ bɛɛ tonɛ ile le ma. Nna tankala-gbengben le Alla la. Nna ninɛ le ale la.

⁸ Nta mɔgɛnu, wo ni la Alla la tumɛ bɛɛ. Wo ni wola tɔrɔyɛ bɛɛ sa ale kɔrɔ bawo wola kan-tina-latankanɛ le ale la.

⁹ Hadama-dannu fɛyanɛ iko ni-lafɛ kelan. A dɔgɔma wo, a kinama wo, wo bɛɛ fu. Hali i ya wo bɛɛ rasuman nya-kun-kelen, wo bɛɛ fɔkɔlɔ iko pukɛ.

¹⁰ I kana i yigi sa kɛlɛ-nyɔgɔnyɛ kuma. I kana i hɛnkili latɛgɛ kankanya-fen-sɔrɔn ma. Hali ila nɔnfuli sabatira nya-wo-nya, i kana i hɛnkili latɛgɛ wo ma.

¹¹ Tuma-wo-tuma, n bi a lamɔɛnna Alla bolo ko ale letan ye sɛnbɛ damasi la

¹² ko ale letan ye keninteya-dannatɛgɛbɛlɛ la. E, n tigi, ile si bɛɛ sara iko bɛɛta kɛ-nya ye nya min.