Yaburi 60 - ALLALA KUMƐ

Kunka-Koe Madiyalɛ

¹ E, Alla, i wara i ban ma la ka kilɛ sa ma ma. I fonde ma ara gboya ma ma nun kɔnɔ i yandi, i ya-lamunun ma la.

² I wara a ma, mala nyamanɛ ara yɛrɛyɛrɛn ha dugu dɛ la ara ka, fan! I yandi, a dɛ min nakanɛ, wo latogon bawo fara-sɔgɛ ye mala nyamanɛ kɛ la.

³ I wara a ma, ita mɔgɛnu bara tɔrɔ kosɛbɛ! Ma ye tonko-tankanna iko gbɛɛtoe si tonko-tankan nya min.

⁴ I gbiliyanɛ minnu bolo, i wara wonu makawandi nun alako wonu kunyɛ ni bɔ kasarɛ kɔrɔ.

⁵ I ni mala madiyali-kan lamɔɛn ka ma kisi ila sɛnbɛ-wɛ la alako i diyana-mɔgɛnu si kanan nya min.

⁶ Alla ara a fɔ ata kan-tina-sɛnimɛ rɔ ko Sɛkɛm soe anubɛ Sukɔti lɛɛ, a si wonu tala ata mɔgɛnu ye nɔlɛ rɔ.

⁷ A ko Kaliyadi nyamanɛ, atɛ le wo la. Manasa nyamanɛ fanan ye wo nya. Ifɛrɛm nyamanɛ manɛ ata kɛlɛ-fulɛ la. Yuda nyamanɛ manɛ ata sɛnɛ-kɔlɔma la.

⁸ A kolan laku tinɛ le Mohabu nyamanɛ la. A si ala sanbarɛ lafili Idɔm nyamanɛ rɔ ka a yira anu na ko atɛ le nyamanɛ wo la fanan. A ye sɔnkɔ-sɔnkɔla bawo a ara Filisiti nyamanɛ nɔ.

⁹ E, Alla, yon si a ma, n ni don Idɔm nyamanita so-karantan rɔ? Yon si a ma, n ni Idɔm mɔgɛnu nɔ?

¹⁰ Tonyɛ, i wara i ban ma la, wa? Mala kɛlɛ-dannu ba ta kɛlɛ-kɛ-tinɛ, i ti kofu ma ma kɛlɛ rɔ, wa?

¹¹ Fɔ i wa ma dɛnbɛ ka ma yogenu kɛlɛ bawo hadama-danta sɛnbɛ, fenfen ma wo la.

¹² Ni ile Alla ye ma fɛ, fɔ ma wa nɔ-ko sɔrɔn. Ma si ma yogenu nɔ le worɔ feu!