Yaburi 6 - ALLALA KUMƐ

Tɔrɔya-Wati Madiyalɛ

¹ E, Mari, i yandi, i kɔrɔtɔnɛ kana n tɔrɔ. Ni i fonde bɔnɛ, i kana n makuma.

² Mari, i yandi, kinikini n ma bawo sɛnbɛ sa n na tun! N nakɛndɛya bawo n kolenu takunnɛ ye n ma.

³ N sɔndɔmɛ lafinnɛ n ma. Mari, i si to n dɛnbɛn-koe masigila ha wati nyamintan?

⁴ Mari, i ya-lamunun n na alako n ni kisi. N nakisi ka a tɛgɛ ila keninteya-dannatɛgɛbɛlɛ ma.

⁵ Mɔgɔ wa faga, a si nyina ile Alla ko. Ni mɔgɛ ara ban donna lakira, a ti i matɔgɔ nyɔ rɔ tun.

⁶ Nna kurɔn ara a ma, n na ara kɔyɔ. Su-wo-su, n si ki n ya-yi tɛma sofa rɔ hali nna kun-kɔrɔ-sɛ, wo si kimɛ n ya-yi bolo yɔgbɔ!

⁷ N yɛ bɛɛ ara yiri diyi-kɛ bolo. N yogenu bara a ma, n sa ko-ragbɛla tun.

⁸ Wole ko-yogoma-kɛlɛnu, wo ni wo bɔ n fɛ bawo Mari ara n di-kɛ-kan lamɔɛn.

⁹ N dira n dɛnbɛn-koe rɔ min kɛ, Mari ara sɔn nna madiyalɛ ma.

¹⁰ N yoge bɛɛ si miliya n ye dɔgɔma-ma-de! Ile Mari le si anu yarabinɛ gben tiriya!