Yaburi 58 - ALLALA KUMƐ

Mɔgɔ-Yogenu Tɔrɔ-Koe, Wo Madiyalɛ

¹ Wole kun-tiginu, wo si ke kiti tɛgɛla a kilɛ fɛ lun-kelen-bɛrɛn? Wo si ke kiti tɛgɛla ni lafisayalɛ sa a rɔ, wa?

² Ade! Wo miriya bɛɛ bɛnnɛ wola ko-yogoma-kɛnu ma tolon! Wo ye karagbɛlɛyɛ kɛla da-wo-da nyamanɛ rɔ.

³ Karagbɛlɛnu bi sɔrɔnna anuta karagbɛlɛyɛ la anu bolo. Anu bi sɔrɔnna lunyɛ min, anu bi foninya-fɔɛ dabirala wulɔn le.

⁴ Anu darɔ-kan manɛ iko duguma-fen-marɛ. Anu bi anu tole gberena

⁵ iko birɛ si a nyɛrɛ tengberenya nya min ala tolonnɛla tolon-kan kɔrɔ. Wo kɔma, wo mani de iko birɛ min si a nyɛrɛ tengberenya duguma-fen-makololɛ bolo.

⁶ E, Alla, i ni karagbɛlɛnu sɛlɛ keri anu da rɔ iko yarɛtɛ ye nya min.

⁷ Anu ni tunu yen, iko yi wa bon dugu ma. Anu tenbi anuna kalabɛn lakɛla, alamɛ anu foora.

⁸ Alamɛ anu mara iko kerekerebakɔndɛ si a namanama-yi to dugi la nya min. Alamɛ anu mara iko dan min fagara a na burɔ bawo wo ma wan-takanɛ yen a yɛ la.

⁹ Yanni anu ni a lɔn, anu ma ara lanfan iko binyɛ. Anu tenbi anu niyi la, ile Alla ni anu kɛndɛ firan ita fondo-bɔɛ la.

¹⁰ Hakɛ-tiginu ba anuta tɔrɔyɛ sɔrɔn, telenbagɛnu si sewa. Anu kiannu ma si ku karagbɛlɛ wonu yele la.

¹¹ Tɔ-a-la, mɔgɛnu si a fɔ ko, “Telenbagɛnu si barayi sɔrɔn yati!” Wo kɔma, anu si a fɔ ko, “Tonyɛ le wo la, yɔ! Alla ye nyɔ min bi duninya kitila.”