Yaburi 57 - ALLALA KUMƐ

Madiyali-Kɛ-Koe Dɛnbɛnɛla Ko La

¹ E, Alla, kinikini n ma bawo ile si n matanka. N bi i kanban kɔrɔ n matanka-koe la ha nna nyagbɛ kɛ ni bɔ n kuma.

² Alla Min Bi Fan Bɛɛ Kun Na, n ba wo rakele, ado a ye n makoe bɛɛ nyinyala,

³ a si a lamɔɛn san-kole rɔ ka n kisi. A si n yoge bɛɛ nɔ. Alla si ata hinɛ anubɛ lanayɛ yira n na.

⁴ N yogenu bara a mini n ma iko yarɛ-mɔgɔ-dɔnnɛnu. Anu nyin manɛ iko tanbɛ anubɛ kalabɛn. Anu dɛ lasanɛ iko faan.

⁵ E, Alla, a ma, ma ni ila kabana-koenu yen san-kole rɔ ka ita gbiliyɛ yen dugu-kole bɛɛ kuma.

⁶ N yogenu ya gbɛrɛ min nasigi n ye wo ya n yigi tɛgɛ son! Anu ya denkɛ sin nta kilɛ la kɔnɔ anu denu-denu buira denkɛ wo rɔ.

⁷ E, Alla, nde ara lanaya-ba sa i rɔ. N si tantoli-bɛti bɔ i ye.

⁸ N si kunden ka nna sɔrɔn anubɛ nna bɔlɔn fɔ. N si kunden subagɛ ma tantoli-bɛti-bɔɛ la n bolo.

⁹ E, n tigi, n si baraka bira i ye sibole bɛɛ yala. N si i tanto-bɛtinu bɔ mɔgɛ bɛɛ ya la.

¹⁰ Ila hinɛ anubɛ lanayɛ kolo iko dugu-kole anubɛ san-kole tɛmɛ ye nya min.

¹¹ E, Alla, a ma, ma ni ila kabana-koenu yen san-kole rɔ ka ita gbiliyɛ yen dugu-kole kuma.