Yaburi 56 - ALLALA KUMƐ

La-Koe Mari la, Wo Madiyalɛ

¹ E, Alla, i ni kinikini n ma bawo n bi tagbɛran rɔ. N yogenu bi n sagaranna tuma-wo-tuma.

² Telen-gbɛn, anu bi tugula n kan ma. N kɛlɛlɛnu siya kati!

³ E, Mari Sɛnbɛ-Bɛɛ-Tigi, n tenbi kilan rɔ, n bi n yigi sala ile le tɔ.

⁴ N lanɛ ile Alla la min kɛ, woletɔ n ti kilan. N si i tanto bawo lanyiri kirinɛ i bolo n kisi-koe la. Hadama-dan si ke nfen mala nde la worɔ?

⁵ N yogenu bi nna kumɛ mayɛlɛmana tuma-wo-tuma. Anu bi kila-kura-nyinɛ le la n tɔrɔ-koe la.

⁶ Anu bi n manɛgɛnna ka n nakɔrɔsi alako anu ni n masɔrɔn ka n faga nya min.

⁷ E, Alla, anu tɔrɔ ka a tɛgɛ anuna karagbɛlɛyɛ ma. I ni mɔgɛ kɛnu nato ila fondo-labɔɛ la dogbe!

⁸ N kira n ya la nya min, i fonde ni to wo ko. I ni n ya-yi lamara a dan na fan do rɔ alako i ni a lɔn n bara min nyɔgɔn diyi kɛ.

⁹ N ya a lɔn serr, ni n ya i rakele i si a ma, n yogenu ni anu masɛgi n na fass! N hɛnkili latɛgɛnɛ ko ile Alla ye n fɛ.

¹⁰ N si ile, Mari tanto ka a tɛgɛ ila lanyiri ma i wara minnu kiri n ye.

¹¹ N lanɛ ile Alla la min kɛ, woletɔ n ti kilan. Hadama-dan si ke nfen mala nde la worɔ?

¹² E, Alla, n bara lanyiri kiri i ye min di-koe rɔ i ma, fɔ n ba wo di i ma gbɛ! N si baraka-bira-kɔ-fannu di i ma

¹³ bawo i wara n bɔ sayɛ kɔrɔ. Hali ka n kian latugu, i ma sɔn wo ma. Ado nfan, n bi Alla fɛ ata wan-takanɛ rɔ min si niyi di mɔgɛ ma.