Yaburi 55 - ALLALA KUMƐ

Mɔgɔ-Madɔnnɛta Madiyalɛ

¹ E, Alla, i wɔlɔ matɔlɔ nta madiyali-kan la. I kana i kan-kɔ sɔ n na.

² I ya-lamunun n na ka nta madiyali-kan lamɔɛn. Hɛnkili-lamiri ara a ma, n fɛrɛ ara ban.

³ N yogenu kuman-kan makilanta. N yisi tinyanɛ karagbɛlɛnuna ko la. Anu bi a mala, tɔrɔyɛ ye buila n ma wati bɛɛ. Nna ko siginɛ anu sɔn ma, ado n gbo anu ye lass!

⁴ N bara kilan dɔgɔma-ma-de! Saya-kilan ara n kumakɔ.

⁵ Kilan ara a ma, n bi yɛrɛyɛrɛnna. N mankulan ara bɔ n ma.

⁶ Alako nun, n kanban taranta iko kangbɔɛ. N si gban n ye nun ka n ni-madɛn-tinɛ sɔrɔn.

⁷ N ni ta pon! N si ta n nyagan sa wulɛ do rɔ nun mɔgɔ sa kan min.

⁸ N si n buri nun. N ni ta n ye kan tinɛ do rɔ, fɔnyɔ anubɛ bandɛ ti ke n ma kan min.

⁹ E, n tigi, anu kan yabasan. Anu kana na anu nyɔgɔn kuli ragbɛ. N bi mɔgɛnu yenna kɛlɛla ka yakɔrɔ-mamɔɛ lana soe burɔ.

¹⁰ Anu sonson ye tagamana mɔgɛnu kuma su-ni-tele. Anu sa fenfen kun na fɔ kɛlɛ-tɛgɛ anubɛ nanparan.

¹¹ Kasarɛ ye soe kan tinɛ bɛɛ rɔ. Anu bi sɛnbɛ sala mɔgɛnu kuma kiti tɛgɛ tinɛ foninyɛ la.

¹² Ni n yoge le ya n manyini, n si ke n muinna le wo ma. Ni n kɛlɛ-nyɔgɛ yɛ tɛgɛra n tɔ, n si ke a masangbala le

¹³ kɔnɔ n bara tɛrɛna n diyana-mɔgɛtɛ le la.

¹⁴ Ma ara kuma-nyimɛ fɔ ma nyɔgɔn tɛma nun. Ma ya batoli kɛ ma nyɔgɔn fɛ Bato-Bɔn la nun.

¹⁵ Alamɛ n yogenu tɛgɛra a ma, yanni anuta wati ni ke. Alamɛ anu kuran tara lakira bawo anu kan-nabila-bɔrɛ le ko-yogoma-kɛ la.

¹⁶ Kɔnɔ n ya nta Mari Alla rakele n dɛnbɛn-koe la. Ale le si to n dɛnbɛna.

¹⁷ Su-ni-tele, nta yasere-masɛ ye kɛla a ma, ado fɔ a wa n kan lamɔɛn de, yɔ!

¹⁸ N ba ta n yogo-siyamɛ kɛlɛ tinɛ tumɛ min, Mari si n bi anu tɛma yenkesen, ka na n na.

¹⁹ Alla min bi habadan-mansayɛ la, wo si n kan lamɔɛn ka anu nɔ bawo anu ma sɔn yɛlɛmana mumɛ! Anu sa kilanna a la muk!

²⁰ N ta-nyɔgɛ kɛ le ya a diyana-mɔgɛnu kɛlɛ. Diyanayɛ min bi anu tɛma, a ya a waralɛ tinya.

²¹ A ye kuma-teleka-telekɛ min nabɔla a da rɔ, wo di iko fɛnɛ kɔnɔ fenfen sa a sɔn-kole rɔ fɔ gboyanayɛ. Fɔlɔ nun, kumɛ min bi bɔla a da rɔ, wonu manɛ n fɛrɛ ma iko tuli kɔnɔ a ye kumɛ min nabɔla a da rɔ kaka, wo mani de n fɛrɛ ma iko anu ba mɔgɔ tɛgɛ faan la.

²² Mɔgɛ bɛɛ ni ala kɔndɔfili don Mari bolo. Ale si wo kumafunfan. A ti sɔn mɔgɔ-telennɛ bu-koe ma.

²³ E, Alla, i si mɔgɔ-fagalɛ anubɛ foninya-fɔlɛnu natosokɔrɔ lakira hali anu siyi ma ban. Kɔnɔ nde lanɛ ile la.