Yaburi 52 - ALLALA KUMƐ

Mɔgɔ-Sɔn-Yogoma-Tiginu Ban-Koe Alla Bolo

¹ Nfenna ile fen-ba-tigi wa ko-yogomɛ kɛ Alla diyana-mɔgɛ la, i si i nyɛrɛ matɔgɔ wola ko la? Allata lanayɛ si to burubukai!

² Telen-gbɛn, i ye i mirila karagbɛlɛyɛ ma. I dɛ latugunɛ iko muru-da-diyamɛ. Tuma-wo-tuma, ile ye i mirila foninya-kurɛ le ma.

³ Ko-yogomɛ di i ye ko-nyimɛ ko. Foninya-fɔɛ di i ye tonya-fɔɛ ko.

⁴ Ile foninya-fɔlɛ, i darɔ-kan si mɔgɛnu tɔrɔ, ado wo di i ye kati!

⁵ Woletɔ fɔ Alla wa i kasara pɔ! A si i gbɔrɔndo ila bɔn la. A si i wurun mɔgɛnu tɛma.

⁶ Ni mɔgɔ-telennɛ ya wo rayen, anu si kilan. Anu si ile mayɛlɛn ka a fɔ ko,

⁷ “Wo ni mɔgɛ kɛ mafɛlɛn, a ma la Alla la ko wo le si a kanan. Fɔ ata nɔnfuli, a lara wo le la. A lara ata karagbɛlɛyɛ la ko wo le si a kisi.”

⁸ N bara-koe ye tala yarɔ Allata bɔn la iko ɔlifi-kɔlɔma si nanfa nya min. N lara ata habadan-keninteyɛ la burubukai!

⁹ Ka a tɛgɛ Alla ara min ma n ye, n si baraka bira a ye dɛɛ! N si baraka bira Alla ye mɔgɛ bɛɛ yala. N si a tɔgɔ-nyimɛ rakaran kan tinɛ bɛɛ rɔ.