Yaburi 50 - ALLALA KUMƐ

Bato-Nya-Bɛrɛ Wara-Koe

¹ Mari Alla Sɛnbɛ-Bɛɛ-Tigi kumara. A ya duninya-mɔgɛ bɛɛ rakele ka bɔ tele-bɔɛ ha tele-yigi.

² Yerusalɛm soe min kin, Allata waan ye malanna wo kuma.

³ Mata Alla ye nala. A madeni sa nala de! Ta-belebele le ye a yarɔ. A ye banda-fin-fɔn-belebele tɛma.

⁴ Alla si san-kole anubɛ dugu-kole kele alako a si ala mɔgɛnu kiti wonu ya la nya min.

⁵ Alla ko ata lanaya-mɔgɛ minnu bara sarama-kan kiri a ye saraka-bɔ-koe rɔ, wonu ni anu gbɛrɛn a ma.

⁶ San-kole si a yira ma la ko kiti-tɛgɛla-latelennɛ le Alla la.

⁷ Alla ya a fɔ ala mɔgɛnu ye ko, “Wole nta mɔgɛnu, wo ni wo tole masɔ n na. Kumɛ ye n bolo wole Isirɛla mɔgɛnu kan ma. Alla le nde la, wota Alla, kɔni.

⁸ N sa kumala wo ma ka a tɛgɛ wola saraka-bɔɛla ko ma. N sa kumala wo ma ka a tɛgɛ wola saraka-mintantɛla ko ma wo ye nala min na n ye tuma-wo-tuma.

⁹ Ado nfan, n sa nyinina wola turɛnu anubɛ wola baanu ma sarakayɛ la

¹⁰ bawo soge min bɛɛsi ye binyɛ rɔ, ntɛ le wonu na. Hali kolo-fen waga yirika-siyaman minnu bi kɔnkɛnu ma, ntɛ le wonu na.

¹¹ Ntɛ le kona dama la. Nima-fan min bɛɛsi ye duninya rɔ, ntɛ le wonu na.

¹² “Ni kɔnkɛ le n na nun, n ti wo manyinika dɔnta ko rɔ bawo fan min bɛɛ ye duninya rɔ, ntɛ le wonu na.

¹³ Nde sa wola turɛ wonu soge dɔnna. Nde sa wola baa wonu yele minna.

¹⁴ Kɔnɔ wo ni baraka-birɛ ma sarakɛ la n ye. Wo ara n yili-madiya fan min bɛɛla ko ma, wo ni wonu di nde, Mari Sɛnbɛ-Bɛɛ-Tigi ma.

¹⁵ Tɔrɔyɛ wa na wo ma, ni wo ya n kele, n si wo dɛnbɛ, ado wo si n gbiliya.”

¹⁶ Kɔnɔ Alla ye a fɔla karagbɛlɛnu ye ko, “Nna tɔn minnu bi wo kunyɛ rɔ, nfenna wo kirinɛ wonu fɔɛ ma? Nfenna wo ye nna sarama-kan wara-koe fɔla?

¹⁷ Wo sa sɔnna, n ni wo latelen. Wo ye wo banna nna tɔnnu na.

¹⁸ Wo wa kankan-wo-kankan yen, wo si ma wo diyana-mɔgɛ la. Wobɛ yɛlannu bi tola ko kelen tɔ.

¹⁹ “Kuma-yogoma-fɔɛ di wo ye tuma-wo-tuma. Tamayi sa wo la foninya-fɔɛ rɔ.

²⁰ Hali wo na-kelen-nyɔgɔ-bɛrɛnu, wo ye karamɛ layɛlɛla anu ma ka fɛɛ sa anu na.

²¹ Wo ara kɛ damasi ma nun kɔnɔ n ma fenfen fɔ. Wole mirinɛ ko nde le iko wole. Kɔnɔ kaka, n bi nala bɔla gbɛ rɔ wo ye ka wo makuma.

²² “Wole min bi wo banna n na, wo ni wo tole masɔ. Ni wo ma, n si wo halaki, ado wola kisila ti taran.

²³ Ka baraka bira n ye, sarakɛ le wo la min si gbiliyɛ di n ma. Min bɛɛ ye n kan tola a gbɛ rɔ, n bi wonu nakisila le.”