Yaburi 5 - ALLALA KUMƐ

Kanan-Koe Madiyalɛ

¹ E, Mari, n tenbi i madiyala, i wɔlɔ matɔlɔ n kuman-kan la. I ni i fonde lamiri n kurun-kan la.

² Nta Mansɛ Alla, i wɔlɔ matɔlɔ n di-kɛ-kan la ka n dɛnbɛ. E, Mari, n bara i madiya sɔgɔma.

³ I ya n kan lamɔɛn sun-tele-tiyi ma. N bara n masigima-koenu fɔ i ye. N sigini de gbɛ ka anu yabilɛ makɔni.

⁴ Wo Alla ma ile la, karagbɛlɛyɛ di min ye, ado i ti sɔn wunduyogoyɛ ma.

⁵ A ma di i ye, i ni mɔgɔ-wasinɛnu yen i kolan la, ado minnu bi tɔn tinyana, wonu gbo i ye.

⁶ I si foninya-fɔlɛ bɛɛ halaki terr! Mɔgɔ-fagalɛ anubɛ yanfantenu sɔgɔ labɔnɛ ile Mari la lass!

⁷ Mari, n si ke tala le ita Bato-Bon-sɛnimɛ la ka a tɛgɛ ila keninteya-dannatɛgɛbɛlɛ ma. N ba ke nyɔ, n si n sa i kɔrɔ ka i bato.

⁸ Mari, i ni telenbagaya-kilɛ yira n na ka a tɛgɛ n yogo-siyamɛla ko ma. I ni n dɛnbɛ alako n ni i sako kɛ.

⁹ Tonya-kuma-wo-kuma sa n yoge wonu da rɔ, fɔ kasarɛ gbansan! Fenfen sa anu da rɔ fɔ yanfanteya-kuma-teleka-telekɛnu. Anuna darɔ-diya-kumɛ wonu si mɔgɛnu natuntun lakira.

¹⁰ E, Alla, mɔgɔ sufa wonu bira ka anu tɔrɔ anu hakɛla ko la. A ma, anuna yanfanteyɛ wonu ni sɛgi anu denu kɔgɔ rɔ. Anu tɔrɔ ka a tɛgɛ anu hakɛ anubɛ anuna murutiyɛ ma. I ni anu bɔ i yakɔrɔ.

¹¹ Kɔnɔ min bɛɛ ye kisi-koe nyinina i bolo, alamɛ wonu tora nyagalen rɔ i bolo ka to sigi sala sewɛ rɔ. Anu yamatogon ila kanan-koe la bawo i di anu ye. Anu si nyagalen bawo i wara min ma anu ye.

¹² Mari, minnu bi ita kumɛ birala anu bolo filɛ la, wonu si ita duwɛ sɔrɔn. Keninteyɛ min bi i bolo anuna ko la, wo mani de iko nɛgɛ-walan min bi anu natankala kɛlɛ rɔ.