Yaburi 49 - ALLALA KUMƐ

Yuwɛ Yigi-Sa-Koe Nɔnfuli Kuma

¹ N bi kumɛ min fɔla, duninya-mɔgɛ bɛɛ ni a tole masɔ kɛ la.

² Minnu bi dala wo, minnu sa dala wo, fen-tiginu wo, bolo-kolɔnnu wo, wo dama ni wo tole masɔ.

³ Hɛnkilimaya-kumɛ le bɔla n da rɔ. Ko-kɔrɔ-lɔn-hɛnkili le ye n bolo.

⁴ N si wo karan hɛnkilimaya-kumɛnu na. N tenbi sɔrɔn fɔla, n bi a kɔrɛ rakaranna wo ye.

^5-6 N tenbi yakɔrɔ-mamɔɛ tɛma, n ti kilan. Karagbɛlɛ fen-tiginu yigi sanɛ anuna nɔnfulu wonu kuma, hali wonu ya n nafoo, n ti kilan n yoge wonu na. Anu bi anu nyɛrɛ matɔgɔla anuna nɔnfuli wonu tɔ.

⁷ Mɔgɔ-wo-mɔgɔ ti ke a niyi-kunka-sarɛ bɔla Alla ye

⁸ bawo niyi-sɔnkɔ sa nyɔ. Nɔnfulu-wo-nɔnfulu sa nyɔ

⁹ min si a lakisi lakira-tɛ ma ka a to a niyi la.

¹⁰ Mɔgɛ bɛɛ ya a lɔn ko hɛnkilimɛ si faga. Kun-takolɔn fanan si na faga. Anu dama si anuna nɔnfuli wonu to anuna dannu bolo anu kɔma.

¹¹ Anuna kaburu si ma anu barɛ la tɛban! Hali dugi ye anu bolo kɔrɔma la, anu ya a laban kanbɛ le tɔ.

¹² Hali mɔgɛ mara tɔgɔlamɛ anubɛ fen-tigi la, a ti kisi sayɛ ma. Fɔ a wa faga iko soge.

¹³ I yɛ lata mɔgɔ-sufa wonu ma minnu yigi sanɛ anu nyɛrɛ rɔ. Minnu yigi sanɛ anuna nɔnfuli kuma, wo ni anu naban-bole mafɛlɛn.

¹⁴ Anu bi fagala le iko sagɛ. Lakira si anu makandan. Lakira min fɛ-yan anu barɛ la, anu si tuli nyɔ rɔ tiriya! Kɔnɔ mɔgɔ-telennɛ minnu bi nala yarɔ, wonu si na fanka sɔrɔn anu kuma.

¹⁵ Kɔnɔ Alla le si n nakanan saya-masibɛ ma.

¹⁶ Ni mɔgɛ mara nɔnfulu-tigi la, wo kana wo yisi magboya wola ko la. Hali ala nɔnfuli tora yiribala, wo kana wo yisi tɔrɔ wo ma.

¹⁷ A wa faga, a ti ta ala nɔnfuli wo la a bolo. Anubɛ ala nɔnfuli wo ti ta, ado a si wo to a kɔma.

¹⁸ Hali mɔgɔ wara-koe ara a nyɛrɛ hɛnɛ, ado mɔgɛnu bi a matɔgɔla bawo a ara bɔ ko ma,

¹⁹ fɔ a wa kofu a benbanu ma lakira pinpi ti bɔ kan min.

²⁰ Hali mɔgɔ makawara, sayɛ ti gban a kun na. Fɔ a wa faga iko soge.