Yaburi 48 - ALLALA KUMƐ

Allata So-Yabɔnɛ Wara-Koe

¹ Mari makawara. Matɔgɛ bɛnta ale le ma. Wo ni a gbiliya ata kɔnkɔ-sɛnimɛ kuma, a halala-soe ye kan min.

² Allata kɔnkɛ kin, ado a layan. Mansa-makawanɛta soe ye sewɛ lanala duninya bɛɛ ma.

³ Alla ara ata kanan-koe yira ma la so-latankanɛ wo rɔ.

⁴ Mansɛnu bara anu kundɛn mala soe kɛ kan ma nun.

⁵ Anu ya soe wo yen wati min, anu kawara. Anu ya anu buri kilan bolo.

⁶ Anu yɛrɛyɛrɛnta iko musi min buyi ara a lamaga

⁷ iko kulɔn ye gbenke-gbenkela mɔgɛ minnu na yi kuma.

⁸ Alla ara koe minnu ma kɔrɔma la, ma ara wonu namɔɛn. Male fanan ara a rayen ma yɛ la mata Mari Alla Sɛnbɛ-Bɛɛ-Tigita soe burɔ. A si a halala-soe to latankɛ rɔ burubukai!

⁹ E, Alla, ma tenbi ila Bato-Bɔn la, i ye ila keninteya-dannatɛgɛbɛlɛ min yirala ma la tuma-wo-tuma, ma ye ma mirila wo le ma.

¹⁰ Mɔgɛnu bi i matɔgɔla duninya kan tinɛ bɛɛ rɔ. Ila tɔgɔlamayɛ ye duninya-tonke bɛɛ rɔ. Ile si maralɛ kɛ telenbagayɛ la.

¹¹ Alamɛ Yerusalɛm kɛnu sewara. Alamɛ Yuda nyamanita-mɔgɛnu nyagalenta bawo ile si kiti tɛgɛ telenbagayɛ la.

¹² Wole Allata mɔgɛnu, wo ni Yerusalɛm soe ratagama ka kan-tina-layan-ba-latankanɛnu dan.

¹³ Wo ni tarɛnu anubɛ wo nyɛrɛ-latanka-bɔnnu nakɔrɔsi. Wo ni kɛ ma alako wo si ke a rakaranna wola dannu ye.

¹⁴ Wo si a fɔ anu ye ko, “Alla kɛ, mata habadan-Alla le. A si to kilɛ yirala ma la ha duninya si ban.”