Yaburi 45 - ALLALA KUMƐ

Bɛti Bɔ-Koe Mansɛla Kɔnyɛ Wara-Koe Rɔ

¹ N bi n mirila bɛti kɛ ma mansɛla ko la tumɛ min, kuma-nyimɛnu ya n sɔndɔmɛ lafa. N nagankuri mara iko sɛbɛli-kalɛ tenbi sɛbɛli-kɛla-nyimɛ bole la.

² Ile mansɛ kin hadama-dan bɛɛ ko, ado i kusan kumala. I wara ban duwɛ sɔrɔnna Alla bolo bui!

³ Ile mansa-sɛnbɛmɛ, ila faan dun i kawɛ la, ile mansa-makawanɛ min bi ko-makawanɛ kɛla, kɔni.

⁴ I ni to kɛlɛ kɛla i sɛbɛ-kuna-wɛ la tonyɛ anubɛ telenbagayɛla ko la. I sɛnbɛ si a ma, i ni nɔ-ko sɔrɔn.

⁵ Ila kalabɛnnu nasulennɛ bɔlibɔli! Anu si i yogenu yisi rasɔgɔ. Sibolo-gbɛrɛnu bi tola buila i kɔrɔ.

⁶ Alla ara mansayɛ min di i ma, wo si to i bolo burubukai! I si ila mɔgɛnu mara telenbagayɛ rɔ.

⁷ Ko-latelennɛ di i ye. Ko-radunɛ gbo i ye. Woletɔ ita Alla ara ile mansɛ yabɔ. A ara i lasewa mansɛ bɛɛ ko.

⁸ Tulu-suma-diyamɛ ye ila kura-sumɛ diyala. Ila fɔli-kɛlɛnu bi i bira boloko-nyimɛ-kɛla ila bolɔn la min tabɛnnɛ sogo-ba-nyin-malɛsɛnɛnu na.

⁹ Musi minnu bi wɔlila i ye, mansa-dan le wonu na. Ile mansɛla bara-musi makirinɛ sɛnɛ-bɛrɛ le la. A sɔnɛ ila mansaya-waganɛ bolo-nyimɛ rɔ.

¹⁰ Ile mansala kɔnya-kurɛ, i tole masɔ nta kumɛ kɛ la. I ni nyina ita mɔgɛnu ko hali i fata kebilɛ.

¹¹ I di mansɛ ye bawo i kin kosɛbɛ! I tigi le ale la, fɔ i ni ata kumɛ bira.

¹² Taya so-burɔ-mɔgɛnu si na i fandɛnu na. A nɔnfulu-tiginu si a ma, wo ni to kan kelen tɔ.

¹³ Mansɛla kɔnya-kurɛ ye kata burɔ, ado a kin dɔgɔma-ma-de! Ala duruki bonnɛ sɛnɛ-yesekari la.

¹⁴ Anu bi nala anubɛ duruku-bonnɛ wo la mansɛ ma. A gba-fɛ-bilala-musumɛnu bi a fɛ. Anubɛ wonu denu bi tala fɔɔ mansɛla bolɔn la.

¹⁵ Anu sewanɛ donta nyɔ.

¹⁶ Nta mansɛ, ile si den-kei-siyaman sɔrɔn min si to mala mansɛ la i kɔma iko anu benbanu. I si anu ma kun-tigi la duninya mumɛ bɛɛ kuma.

¹⁷ Nna bɛti kɛ si a ma, ila mansaya-mankan ni to koloyala burubukai! Mɔgɛ bɛɛ si to i matɔgɔla habadan!