Yaburi 44 - ALLALA KUMƐ

Latanka-Ko-Madiyalɛ

¹ E, Alla, i ya kabana-koe minnu ma fɔlɔfɔlɔ ma benbanuta wati rɔ, ma ya wo lamɔɛn ma nyɛrɛ tole la. Anu bara wonu takaran ma ye.

² I ya Alla-lɔnbɛlɛnu gben anu yarɔ nya min, anu bara wonu fɔ ma ye. I ya nyamanɛ wo ma ila mɔgɛnu halalɛ la. I ya sibolo-gbɛrɛ doinu fanan tɔrɔ nya min, anu ya wo fanan fɔ ma ye. I ya a ma, ita mɔgɛnu sabatira.

³ Kɛlɛ ma a ma, ita mɔgɛnu ya nyamanɛ wo sɔrɔn. Anu ma a sɔrɔn anuta sɛnbɛ dɔrɔn na. Ita sɛnbɛ anubɛ ita fanka, wo le ya a ma, anu ya a sɔrɔn. Anu ya a lɔn min kɛ ko ile ye anu fɛ, wo le ya a yira anu na ko anu di i ye.

⁴ Nta mansɛ anubɛ nta Alla le ile la. Ile le ye a mala, ita mɔgɛnu bi nɔ-ko sɔrɔnna.

⁵ Ita sɛnbɛ le ya a ma, ma ya ma yogenu nɔ.

⁶ N ma la nta kalabɛn anubɛ nna faan la n nakisi-koe rɔ.

⁷ Kɔnɔ ile le ya ma kisi ma yogenu ma. I ya ma gboyana-mɔgɛnu nɔ ka anu namiliya.

⁸ Ma si to i tantola dɛɛ! Ma si to baraka birala i ye burubukai!

⁹ Kɔnɔ i wara i ban ma la kaka. I wara a ma, anu bara ma nɔ. I sa tala mala kɛlɛ-dannu fɛ tun mumɛ!

¹⁰ I ya a ma, ma ya ma buri ma yogenu kɔrɔ. Anu ya ma bolo-fannu bi anu nyɛrɛ ma.

¹¹ I sɔnta ma kan-natɛgɛ-koe ma iko sagɛ. I wara ma ranyɛnsɛn nyamanɛ doinu tɔ.

¹² I ma ila mɔgɛnu dɛ lagbɛlɛya. I ya ma mayira ka ma ma iko fan min dɛ ma gbɛlɛ.

¹³ I ya min ma ma la, ma dan-masa-nyɔgɛnu ya wo yen min kɛ, anu ya ma manyini ka yɛlɛn ma ma.

¹⁴ I wara ma ma yɛlɛnma-fan la sibolo-gbɛrɛnu ye. Anu bi ma bɔrɔbɔla ka anu dɛ bogoya ma telen tɔ.

¹⁵ Tuma-wo-tuma, n bi yarabiyi le kɔrɔ. N yamatogonnɛ miliyɛ le la

¹⁶ bawo ma gboyanɛ ma yoge minnu ye, wonu bi ma manyinina ka yɛlɛn ma ma.

¹⁷ Kɔnɔ hali i wara kɛ damasi sigi ma la, ma ma nyina i ko ka sarama-kan wo tinya min kirinɛ ma tɛma.

¹⁸ Ma ma i baya wɛ. Ma ma ila sereya-wo-dereya tinya wɛ.

¹⁹ Kɔnɔ wo bɛɛ rɔ, i wara ma bolokanɛ to sogo-feremɛnu tɛma. I wara ma bolokanɛ to pinpi-burunnɛ-bɛfu le tɔ.

²⁰ Ni male ya ma fara mata Alla-batoe la nun ka don bɛsi-kɔɛ rɔ,

²¹ fɔ i wa a lɔn nun bawo i ya dogontɔ-koe bɛɛ lɔn.

²² Kɔnɔ anu bi ma fagala ile lela ko la tuma-wo-tuma, anu bi ma bira boloko-yogomɛ-kɛla iko saga-kan-natɛgɛtɛ.

²³ Kunden, Mari. Nfenna ile ye kinɔgɔla? I lakɔɛnma. Ma bolokanɛ kana to i bolo tɛban!

²⁴ Nfenna i ye i kolan dogonna ma ma? I yandi, i kana nyina mala tɔrɔyɛ anubɛ mala yakɔrɔ-mamɔɛ ko.

²⁵ Ma sanɛ dugu ma mɔsɔkɔ-mɔsɔkɔ! Ma bolokanɛ gbangban rɔ.

²⁶ Na ma dɛnbɛ. Ma lakisi ka a tɛgɛ ila keninteya-dannatɛgɛbɛlɛ ma.