Yaburi 40 - ALLALA KUMƐ

Matɔgɔli-Bɛti

¹ N mɛra n muinna Marita dɛnbɛnɛ makɔnɔna. A ya a wɔlɔ matɔlɔ n di-kɛ-kan la.

² A ya n bɔ masiba-denkɛ rɔ ka n nayɛlɛ. A ya n nabɔ kɛn-kolomɛ rɔ ka n sigi farɛ kuma yenkesen, alako n ni kanan nya min.

³ A ya n karan bɛti-kura-sɛ ma min si mata Alla tanto. Minnu ba kɛ damasi yen, wonu si hɛnkili sɔrɔn ka anu yigi sa Mari rɔ.

⁴ Mɔgɔ-sewanɛ le wonu na minnu yigi sanɛ ile Mari rɔ. Wonu ti la bɛsɛ la, hali ka kofu a kɔlɛnu ma.

⁵ Mata Mari Alla, i wara ko-siyaman ma ma ye. I nyɔgɔn sa! I wara kabana-ko-miriya-siyaman tabɛn ma ye. N ti ke anu damasi wara-koe rakaranna. N ma anu dan-natɛgɛ lɔn.

⁶ Ile sa nyinina sarakɛnu anubɛ kɔ-fannu ma ma bolo. I sa ma matarala saraka-mintantɛnu ma, ma si minnu gbuya mintan saraka-mintan-tinɛ kuma. Hali sarakɛ minnu si mala hakɛ bɔ ma ma, i ma ma matara wonuna ko ma. Kɔnɔ min kolo wo dama ko, i wara n tole laka alako n ni ita kumɛ lamɔɛn.

⁷ Woletɔ n ya a fɔ ko, “N bara na. I ye n karanna minnu na, wonu bi ila tɔn-buku rɔ.

⁸ Nta Alla, a di n ye, n ni i diyana-koe kɛ ka ila karan mara n yisi rɔ.”

⁹ E, Mari, ila mɔgɛ bɛɛ ladɛnnɛ wati min, n ya ila kisi-koe wara-koe fɔ anu ye. I nyɛrɛ ya a lɔn ko n ti n tade a fɔɛ ma muk!

¹⁰ I ya ma lakisi nya min, n ma wo fɔɛ dogon n yisi rɔ. I ya ma dɛnbɛ nya min, n tora wobɛ ila lanayɛ wara-koe rakaranna mɔgɛnu ye. N tora ita lanayɛ anubɛ ila keninteya-dannatɛgɛbɛlɛ wara-koe fɔla ita mɔgɛnu ye ladɛn-wɛ rɔ. N ma n tade muk!

¹¹ E, Mari, n ya a lɔn ko nna kinikini ti ban i wara la. Ila keninteyɛ anubɛ ila lanayɛ si to n nakananna.

Madiyali-Kɛ Dɛnbɛnɛ Wara-Koe

¹² N nafoonɛ tɔrɔyɛ min na, n ma wonu dan lɔn. N ma n ta-kilɛ lɔn tun nna hakɛ bolo. N hakɛnu siya n kun-sigi ko ha n yigi ara tɛgɛ feu!

¹³ E, Mari, i latiriya n dɛnbɛna. I ni n nakisi.

¹⁴ Minnu bi n faga-koe rɔ, alamɛ wonu kuruta n ma ka miliya. Minnu sewanɛ nna tɔrɔyɛla ko la, alamɛ wonu ya anu kɔ-sɛgi miliyɛ bolo.

¹⁵ Minnu bi n mayɛlɛnna, alamɛ wonu sɛgira yarabiyi bolo.

¹⁶ Minnu bi anu gbɛrɛnna ile Mari ma, alamɛ wonu nyagalenta ka sewa. Minnu bi baraka birala ile Alla ye ita kisi-koela ko la, alamɛ wonu tora a fɔla ko, “Mari makawara!”

¹⁷ N tigi, bolo-kolɔn le n na. N sɛnbɛ sa. Kɔnɔ hali wo, i ma nyina n ko. Nna kisilɛ anubɛ nta Alla le ile la. I yandi, i latiriya n dɛnbɛna.