Yaburi 37 - ALLALA KUMƐ

Mɔgɔ-Yogomɛ anubɛ Mɔgɔ-Nyimɛla Ban-Nya

¹ Mɔgɔ yisi kana tinya karagbɛlɛnuna ko la. I yɛ kana bɔ ko-yogoma-kɛlɛnu na ka i sanka anu ma.

² Anu na si gbala tiriya iko bin-wurunnɛ si faga nya min.

³ La Mari la. I ni ko-nyimɛ kɛ. Wo si a ma, i ni sigi i fanbolo ila nyamanɛ rɔ.

⁴ I ni Mari diyana-koe kɛ. Wo kɔma, a si i kɔntɔ-koenu kɛ i ye.

⁵ I nyɛrɛ latenbi Mari ma. Ni i lara ale la, a si i dɛnbɛ de!

⁶ A si a ma, ila telenbagayɛ ni malan iko tele latelan.

⁷ I muin. I ni Mari makɔni. Hɔnya kana i bira bawo mɔgɛ donu bara-koe ye tala yarɔ. I kana hɔn bawo ko-yogoma-kɛ ara diya ko-yogoma-kɛlɛnu na.

⁸ I fara yisi-bɔɛ la. I kana hɔn fanan bawo wonu si i don hakɛ rɔ.

⁹ Minnu lanɛ Mari la, wonu si sigi anu halala-nyamanɛ rɔ kɔnɔ karagbɛlɛnu, wonu bara-koe si firan nyɔ.

¹⁰ A ti mɛ lefan, karagbɛlɛnu bara-koe si tunu yen! I si anu nyini, ado anu na si to dogbe!

¹¹ Nyamanɛ wo si ma mɔgɔ-famayiginɛnu halalɛ la. Anu si taran anu diya yisi-kimɛ rɔ.

¹² Karagbɛlɛnu si mɔgɔ-nyimɛnu yanfa. Anu si to anu wunu-wununa gboyanayɛ bolo.

¹³ Kɔnɔ Mari ye yɛlɛnna karagbɛlɛ wonu ma bawo a ya a lɔn ko wonu sa mɛla halakila.

¹⁴ Karagbɛlɛnu bi anuna faannu saganna anu lɛɛ rɔ ka anuna kalabɛnnu fanan tasagan bolo-kolɔnnu anubɛ makolamɛnu tɔgɔ rɔ. Ko-latelenni-kɛlɛnu faga-sɔgɛ ye anu na.

¹⁵ Kɔnɔ karagbɛlɛ wonu tɔgɔ si to anuna faan wonu na. Anuna kalabɛn wonu ta si murundu.

¹⁶ Fen-dɔgɔmanɛ min bi mɔgɔ-nyimɛnu bolo, wo fisa karagbɛlɛnuta fen-belebele-wɛ ko

¹⁷ bawo Mari si karagbɛlɛnu sɛnbɛ bi anu bolo ka mɔgɔ-telennɛnu nakanan.

¹⁸ Minnu bi Mari sako kɛla, a si wonu fɛ-bira. Dugi si to anu bolo tɛban!

¹⁹ Anu ti tɔrɔyɛ sɔrɔn gbɛlɛyɛ rɔ. Anu si taran anu diya kɔnkɔ-fitinɛ rɔ.

²⁰ Kɔnɔ karagbɛlɛnu si faga. Mari-yogenu si halaki iko kɔn-fere ka tunu yen! Anu si tunu yen iko fira-mintan ta-sisi.

²¹ Karagbɛlɛ si fan sinka kɔnɔ a ti a lasɛgi tun kɔnɔ mɔgɔ-nyimɛ, wo latiri mɔgɔ kɔla.

²² Minnu bi Marita duwɛ sɔrɔnna, wonu denu halalɛ ye mala nyamanɛ wo la. Kɔnɔ minnu bi ata dankɛ kɔrɔ, wonu bara-koe si firan nyɔ feu!

²³ Mari si mɔgɔ kunyɛ telen kila-nyimɛ la. Minnu bi a sako kɛla, a si wonu nakanan.

²⁴ Ni anu ya anu kian latugu ka tonko-tanka, Mari ti sɔn anu ni bui. A si anu bira anu bole ma.

²⁵ Kina le nde la gbɛ! N bara mɛ doni. Kɔnɔ ha bi, nde ma a yen bɛ, Mari ara mɔgɔ-nyimɛ boloka. Min kolo wo ko, n ma mɔgɔ-nyimɛ wola dannu yen bɛ mɔgɔ tarala dɔn-fan ma.

²⁶ A si mɔgɔ kɔ tuma-wo-tuma ka anu dɔndɔ fanan. Ala dannu si a ma, a ni sewa.

²⁷ I fara ko-yogoma-kɛ la ka ko-nyimɛ kɛ. Wo si a ma, nyamanɛ kɛ ni ma wo kegeyɛnu halalɛ la

²⁸ bawo koe min telennɛ, wo di Mari ye. Wo le si a ma, a ti ata mɔgɔ-telennɛnu boloka. A si to anu natankala burubukai! Kɔnɔ a si karagbɛlɛnuna dannu wara-koe firan nyamanɛ wo rɔ.

²⁹ Nyamanɛ wo si ma mɔgɔ-telennɛnu halalɛ la tɛban! Anu si to sigini nyɔ habadan!

³⁰ Hɛnkilimayɛ ye mɔgɔ-nyimɛta kumɛ rɔ. A ti lafisayalɛ kɛ.

³¹ A si ata Allata tɔn bira a yisi rɔ. A ti ala kumɛ radu muk!

³² Karagbɛlɛ si a yɛ sa mɔgɔ-latelennɛ fɛ kɛlɛlɛ! A si wo ma alako a si a bila nanparan rɔ nya min ha anu ni wo faga.

³³ Kɔnɔ Mari ti mɔgɛ wo gbala a yogenu bolo la. Ni anu tara a lakiti, Mari ti sɔn a kunyɛ ni to kiti wo rɔ.

³⁴ I yigi sa Mari rɔ ka ata tɔnnu bira. Wo si a ma, i ni gbiliyɛ sɔrɔn. Nyamanɛ ni to i bolo worɔ. Mari tenbi karagbɛlɛnu gbenna nyamanɛ wo rɔ, i si wo rayen i yɛ la.

³⁵ N ya karagbɛlɛ do lɔn min si to nyɛɛla mɔgɛnu ma. A sankanya ye mɔgɛ bɛɛ kuma iko kɔlɔma-kuru-wɛ minnu bi Lɛbanan kɔnkɔ-nyamanɛ rɔ.

³⁶ Kɔnɔ lunyɛ do, n bɔra nyɔ-kilɛ la kɔnɔ a sa nyɔ. N ya a nyini furr, kɔnɔ n ma a yen.

³⁷ Mɔgɔ-nyimɛ mafɛlɛn ka mɔgɔ-latelennɛ lakɔrɔsi. Min yisi-kimanɛ, kun-nadiyɛ si kɛ wola dannu ye.

³⁸ Kɔnɔ hakɛ-tigi, wo la ye tola le dogbe! Hali a kegeyɛnu, wonu na si to.

³⁹ Mari si mɔgɔ-telennɛnu nakisi. Anu tenbi kɔndɔfili rɔ, a si anu natanka.

⁴⁰ A si anu dɛnbɛ ka anu nakanan. A si anu kanan karagbɛlɛnu masibɛ ma bawo anu denu si ta Mari wara anu nakanan-koe la.