Yaburi 36 - ALLALA KUMƐ

Hadama-Danta Karagbɛlɛyɛ Wara-Koe

¹ Kumɛ do ye n yisi rɔ ka a tɛgɛ mɔgɔ-yogenuna wunduyogoyɛ ma. A si a ban Alla la. Kilan sa a rɔ Alla wara la muk!

² A wasinɛ ha, a mirinɛ ko a ye hakɛ minnu kɛla, Alla ti wonu lɔn ka a kɔn wola ko la.

³ Fenfen sa a da rɔ fɔ kuma-yogoma-fɔɛ anubɛ foninya-fɔɛ. Alela ko sa hɛnkilimaya-koe anubɛ ko-nyimɛ wara-koe rɔ tun.

⁴ A tenbi sani, a ye a mirila ko-yogomɛnu-tabɛn-koe ma. A ti ko-wo-ko ladan min kin. A ti a ban ko-yogomɛnu kɛ-koe ma.

Allata Nyimayɛ Wara-Koe

⁵ Mari, ila keninteya-dannatɛgɛbɛlɛ ye yɛlɛla ha san-kole. Ila lanayɛ ye tugula banda-finyɛ la.

⁶ Ila telenbagayɛ yan iko kɔnkɔ-layan-bɛnu. Ni mɔgɛ si kɔgɔ-yi-dumɛ kɔrɛ lɔn, mani, mɔgɛ si ile Marita kiti-tɛgɛ-nya lɔn. Hadama-dannu anubɛ sogenu namaranɛ ile Mari le bolo.

⁷ E, Alla, ila keninteya-dannatɛgɛbɛlɛ sɔnkɔ ti sɔrɔn. Ma lakanannɛ i kanban kɔrɔ.

⁸ Ma tenbi ladiyɛ rɔ i warɛ bɔn la, ma ti dɔn-fan ban ile bolo. Ita ko-nyimɛ mani de ma ye iko ba-belebele, ma si ma min kan min.

⁹ Niyi-bɛɛ-kunyɛ bɔra ile le bolo. Ka a tɛgɛ ita waan wo ma, wo le ye a mala fanan, ma ye ko ragbɛla.

¹⁰ Minnu ya i lɔn, to ila keninteyɛ yirala wonu na. I ni to ko-nyimɛ kɛla mɔgɔ-telennɛnu ye.

¹¹ I kana sɔn, mɔgɔ-wasinɛnu ni n kɛlɛ. I kana sɔn, karagbɛlɛnu ni n gben.

¹² Wo ni wo yɛ lata karagbɛlɛ-buinɛnu ma n kɔrɔ. Anu ti ke anu nasɔla tun.