Yaburi 35 - ALLALA KUMƐ

Dɛnbɛnɛ Madiyalɛ Wara-Koe

¹ Mari, minnu sɔnɛ n na, i ni wuli wonu kan ma. Minnu bi n kɛlɛla, wonu kɛlɛ.

² Na kɛlɛ-dannuta matanka-fannu na. I ni na n matanka tinɛ.

³ Minnu bi n sagaranna, ila tanbɛ anubɛ ila tɛgɛran bi wonu tɔgɔ rɔ. I ni n yili-madiya ko i si n nakisi le.

⁴ N faga-sɔgɛ ye minnu na, alamɛ i ya wonu nɔ ka anu yarabi. Minnu bi yanfɛ rabɛnna n ma, alamɛ wonu kɔndɔfilinɛ sɛgira.

⁵ Mari, ita melika tenbi n yogenu gbenna, alamɛ anu mara iko bin-gbalɛ, fɔnyɔ ye tala min na pon!

⁶ Ita melika tenbi anu sɔnsɔnna alamɛ pinpi burunta anuna kilɛ la. Anu ni nama gbalaki!

⁷ Anu ya yili lasigi n ye, hali n ma baga anu ma. Anu ya denkɛ tɛgɛ n ye falen, n bira-koe la.

⁸ Kɔnɔ yaga, anu bi nala kasarala latɛrɛnɛ bolo. Anu si bira anu nyɛrɛta yili-lasiginɛ wo la. Anu si bui anu nyɛrɛta denka-sinnɛ wo rɔ.

⁹ N si sewa ka a tɛgɛ Mari ara min ma n ye. N si nyagalen bawo a ara n nakisi.

¹⁰ N si a fɔ Mari ye n sɛbɛ-kuna-wɛ la ko, “Ile Mari nyɔgɔn sa! Sɛnbɛ sa minnu na, i ni wonu nakisi sɛnbɛ-tiginu masibɛ ma. I si bolo-kolɔnnu tanka kensuntenu ma.”

¹¹ Foninya-fɔlɛnu ya karamɛ layɛlɛ n ma. Anu ya a fɔ ko nde ara koe do ma, ado n sa wo kalama.

¹² Anu ya nna ko-nyimɛ sara ko-yoge la. Wo ya n yisi tinya ka n to kelengboyɛ rɔ.

¹³ Kɔnɔ n yoge wonu kirayanɛ, n dira anuna ko la kosɛbɛ! N ya kasa-duruki bila n kan la ka n nyɛrɛ lakɔnkɔ anuna ko la. Nna madiyalɛ ma yabilɛ sɔrɔn min kɛ, n tora dila anuna ko la

¹⁴ iko n na-kelen-nyɔgɔ-bɛrɛbɛrɛ, ni wo ma, n diyana-mɔgɛ. N ya n kunyɛ layigi ka di anuna ko la iko n sɔrɔn-na-bɛrɛ.

¹⁵ Kɔnɔ tɔrɔyɛ ya n sɔrɔn wati min, anu dama nyagalenta. Anu ya a kinki n ma ka n mayɛlɛn. Mɔgɛ kɛnu ya n natɛrɛna ka kɛ n ma. Anu ya n kumakiri foninyɛ la.

¹⁶ Anu ya n mayɛlɛn iko Alla-lɔnbɛlɛnu si mɔgɔ mayɛlɛn nya min. Anu ya n wululu gboyanayɛ bolo.

¹⁷ N Mari, i si to i kolan gbalala n na ha wati nyamintan? N nakisi n yogenu bolo. N bɔ yarɛ kɛnu da la.

¹⁸ I wa ban wo mala n ye tumɛ min, n si baraka bira i ye mɔgɛ bɛɛ yala. N si i tanto anu yakɔrɔ.

¹⁹ N gboyanɛ n yoge minnu ye, kɔrɔ sa a la, i kana sɔn, wonu ni wasi n kuma. N yisi tinyanɛ wati min, i kana sɔn, n yogenu ni yɛlɛn n ma.

²⁰ Anu sa yisi-kima-kuma fenfen fɔla fɔ anu bi tɔgɛ minnu sala yisi-kima-mɔgɛnu na.

²¹ Anu bi anu dɛ sala a ma ka a fɔ ko, “Ɔn-hɔn! I wara min ma, ma ara wo yen!”

²² E, Mari, i wara kɛ damasi yen! I madenɛ kana na to. I kana i masɛgi n na pon!

²³ I lakɔɛnma, i ni na n nakisi tinɛ! Nta Alla, nta Mari, kuma nna ko la.

²⁴ E, Mari, bawo ile telennɛ, a fɔ mɔgɛ kɛnu ye ko fɛɛ sa n na. I kana sɔn, anu ni wasi n kuma.

²⁵ I kana sɔn, anu ni a fɔ n ma ko, “Ma ye nyinina min ma, wo le wara ma, yɔ! A ara tunu ma tɛma yen!”

²⁶ Minnu sewanɛ nta tɔrɔyɛla ko la, alamɛ wonu ya nanparan sɔrɔn ka yarabi. Minnu bi anu nyɛrɛ kɔrɔbila ka tenbi nde la, alamɛ miliyɛ donta wonu kun na yorobi!

²⁷ Minnu bi a fɔla ko nde ma ko tinya, alamɛ wonu ya a lawɔyɔ sewɛ bolo. Anu ni to a fɔla tolon, ko, “Mari min sewanɛ ala wɔli-kɛlɛla yarɔma-ta-koe la, alamɛ wo ya gbiliyɛ sɔrɔn!”

²⁸ Wo kɔma, n si to ila telenbagayɛ wara-koe fɔla ka to i tantola tolon!