Yaburi 34 - ALLALA KUMƐ

Allata Nyimayɛ Wara-Koe

¹ N si baraka bira Mari ye tuma-wo-tuma. N ti n tade a tantolɛ ma mumɛ!

² N si a tanto ala kɛwɔli-nyimɛnuna ko la. Minnu bi yakɔrɔ-mamɔɛ rɔ, alamɛ wonu ya anu tole masɔ ka sewa.

³ Wo ni kofu n ma Mari gbiliya tinɛ. Ma ni a tanto ma nyɔgɔn fɛ wona.

⁴ N ya Mari madiya, ado a ya nna madiyali-kan lamɔɛn. A ya n bɔ n takilan-koe bɛɛ rɔ.

⁵ Mɔgɔ-tɔrɔnɛnu ba anu yigi sa Mari kuma tumɛ min, anu si sewa. A ti anu baya hali!

⁶ Bolo-kolɔnnu ba di a dala, Mari si a wɔlɔ matɔlɔ anuna di-kɛ-kan la ka anu madɛnbɛ. A si anu bɔ anuna yakɔrɔ-mamɔɛnu tɔ.

⁷ Minnu bi Mari gbiliyala, ata melika si wonu kandan. A si anu tanka masibɛ ma.

⁸ I nyɛrɛ ni Marita nyimayɛ mafɛlɛn alako i ni a lɔn a kin nya min. Minnu natankanɛ a bolo, mɔgɔ-sewanɛ le wonu na.

⁹ Wole Marita mɔgɛnu, wo ni a gbiliya. Minnu bi a kuman-kan tola a gbɛ rɔ, a si wonu makoe bɛɛsi nyinya.

¹⁰ Hali yarɛnu ta si faga kɔnkɛ bolo. Kɔnɔ minnu bi Marita tɔnnu birala, fenfen ti dasa wonu ma.

¹¹ Wole nna dannu, wo ni wo tole masɔ n na. N si wo labila Mari gbiliya-nya la.

¹² Wo ye a fɛ, wo ni to wo diya, wa? Wo ye nyinina simayɛ anubɛ sewɛ ma, wa?

¹³ Nba, ni kɛnu di wo ye, wo ni fara foninya-fɔɛ anubɛ kuma-gbondani-fɔɛ la.

¹⁴ Wo ni wo bole bɔ ko-yogoma-kɛ rɔ ka ko-nyimɛnu kɛ. Wo ni wo raya ka sigi yisi-kimɛ rɔ.

¹⁵ Mari kolan bɛnnɛ mɔgɔ-latelennɛnu ma. A wɔlɔ matɔlɔnɛ anu di-kɛ-kannu na.

¹⁶ Kɔnɔ minnu bi karagbɛlɛyɛ kɛla, a si wonu yakɔrɔ-mamɔ woletɔ anu ba faga, mɔgɛnu si nyina anu bara-koe la tiriya!

¹⁷ Mɔgɔ-latelennɛ wa Mari rakele, a si a wɔlɔ matɔlɔ a la. A si anu kunyɛ bɔ anuna tɔrɔyɛnu tɔ.

¹⁸ Minnu yisi magboyanɛ, Mari gbɛrɛnnɛ wonu ma. Minnu yigi ara tɛgɛ, a si wonu nakisi.

¹⁹ Mɔgɔ-nyimɛ si tɔrɔya-siyamɛ sɔrɔn kɔnɔ hali wo, Mari si a kisi tɔrɔyɛ wo bɛɛsi ma.

²⁰ Mari si a latanka a kin na! Hali a kolo kelan ti keri.

²¹ Karagbɛlɛ tɔgɔ si to ala karagbɛlɛyɛ la. Mɔgɔ-latelennɛ gbo minnu ye, Mari si wonu tɔrɔ.

²² Mari si ata mɔgɛnu kisi. Minnu bi tala a wara alako Mari ni anu natanka, Mari ti wo tigi tɔrɔ.