Yaburi 33 - ALLALA KUMƐ

Tantoli-Bɛti Wara-Koe

¹ Wole minnu telennɛ, wo ni a lawɔyɔ sewɛ bolo ka a tɛgɛ Mari ara min ma wo ye. Wole minnu bi ala kumɛ birala, wo ni a matɔgɔ.

² Wo ni sɔrɔn fɔ ka baraka bira Mari ye. Wo ni fɔli-fannu kɛ-a-rɔ ka a matɔgɔ-bɛti bɔ.

³ Wo ni bɛti-kurɛnu bɔ a ye. Wo ni mɔlɔnɛ tɛgɛ sɔrɔn fɔ tinɛ. Wo ni a lawɔyɔ sewɛ bolo.

⁴ Tonyɛ le Marita kumɛ la. Mari telenni de koe bɛɛ ladan tinɛ.

⁵ Koe minnu telennɛ, wo di Mari ye bɛrɛbɛrɛ-wɛ kɛ. Ala keninteya-dannatɛgɛbɛlɛ si duninya kɛ lafa le pen!

⁶ Mari kumara le gbansan, san-kole ladanta. Tele wo, karɛ wo, lolenu wo, ata kuma-gbansan le ya wonu nadan.

⁷ A ya kɔgɔ-yi ladɛn daga kelen tɔ. A ya kɔgɔ-yi-dumɛ balan iko mɔgɛ wa fui-fan kɛ bondɔn rɔ.

⁸ Duninya-mɔgɛ bɛɛ ni Mari bato. Mɔgɛ bɛɛ ni kawa a ma.

⁹ A kumara le dɔrɔn, duninya danta. A kuman-kan ya a ma, duninyama-fan bɛɛ bɔra gbɛ rɔ.

¹⁰ Mari ya sibolo-gbɛrɛnuna miriya-yogenu tinya. A ya a ma, anuna miriya-yogenu tora anu burɔ.

¹¹ Kɔnɔ Marita miriya-nyimɛnu si to nyɔ habadan! Mari kɔntɔ-koenu ti yɛlɛma mumɛ!

¹² Marita sibolo-yabɔnɛ si to a diya. Alla ara anu denu minnu yabɔ, anu sewanɛ si to.

¹³ Mari si a kolan layigi ka bɔ san-kole rɔ ka hadama-dannu yen.

¹⁴ A si to ala mansaya-tinɛ rɔ ka duninya-mɔgɛ bɛɛ mafɛlɛn.

¹⁵ A ya mɔgɛ bɛɛ hɛnkili ladan. Anu bi koe min bɛɛ mala, a ye wo bɛɛ kalama.

¹⁶ Mansɛta kɛlɛ-dannu siya min kɛ dɔrɔn, a ti kɛlɛ nɔ. Kɛlɛ-dannu sɛnbɛ dɔrɔn ti a ma, a ni kɛlɛ nɔ.

¹⁷ Kɛlɛ-dannuna soeenu dɔrɔn ti a ma, anu ni kɛlɛ nɔ. Anuna soeenu sɛnbɛ dɔrɔn ti a ma, anu ni kisi.

¹⁸ Mari kolan bɛnnɛ a gbiliyalɛnu ma. Minnu bara la Mari la ka anu yigi sa ata keninteya-dannatɛgɛbɛlɛ rɔ, a kolan bɛnnɛ wonu fanan ma.

¹⁹ A ye anu natankala sayɛ ma. A si anu de-nyini hali kɔnkɔ-fitinɛ rɔ.

²⁰ Ma yigi bɛɛ bɛnnɛ Mari le ma. Ma dɛnbɛlɛ anubɛ ma latankalɛ le Mari la.

²¹ Ma sewanɛ ala wɔli-nyimɛla ko la. Ma lanɛ a la bawo a sɛnima.

²² Mari, ma wa ma yigi sa i rɔ, alamɛ ila keninteya-dannatɛgɛbɛlɛ tora ma fɛ.