Yaburi 31 - ALLALA KUMƐ

Yigi Sa-Koe Mari rɔ, Wo Madiyalɛ

¹ Mari, n nara i wara le nna kanan-koe rɔ alako n kana na miliya. I telennɛ min kɛ, woletɔ n bi i madiyala alako i ni n nakisi.

² I wɔlɔ matɔlɔ n na. I ni n nakisi tiriya! I ni ma nna kisi tinɛ la.

³ Nna kisi tinɛ le ile la min kɛ, i ni kilɛ yira n na iko i wara n yili-madiya nya min.

⁴ Anu bara gbɛrɛ min nasigi n ye, n natanka wo ma bawo nna kisilɛ le ile la.

⁵ Mari, n bara n nyɛrɛ dantɛgɛ i ma. I si n nakisi bawo Alla, kan-kelen-tigi le ile la.

⁶ Minnu bi bɛsɛnu kɔla, wonu gbo n ye kosɛbɛ! Nde lanɛ ile Mari le la.

⁷ N si nyagalen bɛrɛkɛ ka a tɛgɛ ila keninteya-dannatɛgɛbɛlɛla ko la. I ya nna tɔrɔyɛ bɛɛ yen. I ya nna nyagbɛ bɛɛ lɔn.

⁸ I ma sɔn, n yogenu ni n bira kɔnɔ i ya a ma, n nafɛrɛnɛ tara.

⁹ Mari, kinikini n ma bawo n bi tɔrɔyɛ rɔ. N yɛnu bara yiri diyi-kɛ bolo. N sɛnbɛ ara tɛgɛ.

¹⁰ Kinikinɛ ara to n mala yɔgbɔ! Diyi ara to n niyi madɔgɔyala n tɔ. Nna kɔndɔfilinu bara n tafaga. Hali n kolenu bara yɔlɔkɔ.

¹¹ Hali n sigi-nyɔgɛnu anubɛ n yogenu, n sɔgɔ la ara bɔ wonu na lass! Minnu ya n lɔn kɔrɔma la, wonu kilannɛ n na. Anu ba n yen soe tɛma, anu si anu buri n kɔrɔ.

¹² Mɔgɛ bɛɛ ara nyina n ko. A mani de iko n bara faga le. N mani de iko mɔgɛnu bi bɔnku-daga-gbɛnkian min nakɛla a rɔ.

¹³ N bi n yogenu wɛwɛ-sa-kan lamɔɛnna. Kilan ye nna foolɛ rɔ. Anu bi n faga-mɔlɔnɛ bɛɛ ladanna.

¹⁴ Kɔnɔ Mari, nde lara ile le la. Nta Alla le ile la.

¹⁵ N bi ita gbɔfɛ rɔ wati mumɛ bɛɛ kɔrɔ. N nakisi n yogenu ma. Minnu bi n napɛrɛnna, n nakisi wonu ma.

¹⁶ I ni i kolan-nyimɛ sɔ nde, ila wɔli-kɛlɛ la. N nakisi ila keninteya-dannatɛgɛbɛlɛ la.

¹⁷ Mari, n bi i rakelela. A ma, n kana na yarabi. Alamɛ karagbɛlɛnu yarabira. Alamɛ anu tara kaburu-madɛnni-dondon-bɛ rɔ.

¹⁸ Alamɛ tɔn sigira foninya-fɔlɛnuna kumɛ la. Nyɛrɛmankolɛ le anu na, ado anu wasira. Anu bi mɔgɔ-telennɛnu tasɛla.

¹⁹ Ile ye ko-nyimɛ min bɛɛsi lamarala i gbiliyalɛnu ye, wo kin. Mɔgɛ bɛɛ ya ila ko-nyima-kɛ lɔn. Minnu lara i la, i ye wonu birala a kin na!

²⁰ I ye anu dogonna i warɛ, karagbɛlɛnu miriya ti ke anu ma kan min. Anu tenbi nyɔ, i si anu tanka anu fɛɛ-donnɛnu masibɛ ma.

²¹ Mari tanto! N yogenu ya n nafoo tumɛ min n kɛlɛ-koe la, ale Mari ya ala keninteya-dannatɛgɛbɛlɛ yira n na a kila-bɛrɛbɛrɛ fɛ.

²² N kilanta. N ya a lɔn nun ko Mari ara n gben a dafɛ. Kɔnɔ n ya a rakele tumɛ min n dɛnbɛn-koe la, a ya n di-kɛ-kan lamɔɛn.

²³ Wole Marita lanaya-mɔgɛnu, wo ni Mari keni. Mari si to ata telenbagɛnu natankala kɔnɔ a si mɔgɔ-wasinɛnu tɔrɔ iko a bɛnta, anu ni tɔrɔ nya min.

²⁴ Wole minnu lanɛ Mari la, wa wo yisi gbɛlɛya ka wo kerinteya.