Yaburi 29 - ALLALA KUMƐ

Mari Kuman-Kan Bɔ-Koe Fɔn-Digidigi-Wɛ Rɔ

¹ Wole nima-fan minnu bi san-kole rɔ, wo ni Mari tanto. Wo ni Mari gbiliya ka a tanto ata sɛnbɛla ko la.

² Wo ni a tɔgɔ gbiliya iko a bɛnta, a ni gbiliya nya min. Ale wa na, wo ni wo madu a kɔrɔ ka a bato.

³ Mari kuman-kan ye bɔla kɔgɔ-yi kuma. A tenbi kumala, a mani de iko fɔnyɔ anubɛ san-gbalamɛ.

⁴ Mari kuman-kan si a yira mɔgɛnu na ko mansa-makawanɛ le ale la.

⁵ Mari kuman-kan si kɔlɔma-belebele-wɛnu takerikeri. Katarala Lɛbanan kɔlɔmanu ma minnu tagbɛlɛ gbon!

⁶ A ye a mala, Lɛbanan kɔnkɛnu ni yɛrɛyɛrɛn iko tura-bulannu tenbi gberenya bɔla. Hali Hɛrɔman kɔnkɔ-layan-bɛ, wo fanan si gberenya bɔ.

⁷ Mari kuman-kan si ma iko bandɛ tenbi a nyin masɔgɔla.

⁸ A kuman-kan si a ma, Kɛdɛsi wula-da-rakolɔn ra ni maga.

⁹ A kuman-kan si kɔlɔma-tagbɛlɛ-wɛnu namaga. A si kɔlɔma-yanbɛnu sagan a la. Kɛnu tenbi mala wati min, wo si a taran, mɔgɛnu bi a lawɔyɔla Bato-Bɔn la. Anu bi a fɔla ko, “Gbiliyɛ ni di Alla ma.”

¹⁰ Mari le fan bɛɛ kun na hali kɔgɔ-yi. A si to mansayɛ la burubukai!

¹¹ Mari si sɛnbɛ di ata mɔgɛnu ma. A si ata duwɛ layigi anu kuma. Anu ni yisi-kimɛ sɔrɔn.