Yaburi 26 - ALLALA KUMƐ

Mɔgɔ-Nyimɛnuta Madiyalɛ Wara-Koe

¹ N Mari, a ma, n ni yo sɔrɔn bawo n bi ko-latelennɛ kɛla, ado n lanɛ i la gben!

² Mari, n tasuma ka n nakɔrɔsi ka n kɔntɔ-koenu anubɛ nna miriyanu lɔn.

³ Ila keninteya-dannatɛgɛbɛlɛ le n kandannɛ la. Ila lanayɛ ye n yarɔ ka kilɛ yira n na.

⁴ Mabɛ kuntannu ti taran ma nyɔgɔn fɛ. N mako sa kuma-fila-fɔlɛnu na.

⁵ N sa a fɛ, n ni taran karagbɛlɛnu kurun tɔ. N ti bila wunduyogenu kurun tɔ.

⁶ N Mari, n bara n bole mafiran ka a yira i la ko n yilikini ma. N bara tugun ila mɔgɛnu na minnu bi ila saraka-mintan-tinɛ lafoola.

⁷ N bara baraka-bira-bɛti bɔ i ye wo le ya a ma, n bara ila kabana-koenu karan mɔgɛnu ye.

⁸ E, Mari, i mayiginɛ Bato-Bɔn min na, bɔn wo di n ye kati! Kan-tinɛ le wo la ita gbiliyɛ ye kan min.

⁹ I kana mabɛ hakɛ-tiginu kasara. Mɔgɔ-fagalɛnu si ban nya min, n natanka wo ma.

¹⁰ Minnu kɛwu karagbɛlɛya-kɛ-tinɛ, wo le mɔgɔ-sufa kɛnu na, ado anu tabɛnnɛ dogonta-fan bira-koe ma tuma-wo-tuma.

¹¹ Kɔnɔ nde ye ko-latelennɛ kɛla tuma-wo-tuma. I ni kinikini n ma ka n nakanan.

¹² N lanɛ a la ko n tankanɛ masiba-koe bɛɛ ma. N bi Mari tantola ala mɔgɛ bɛɛ yakɔrɔ.