Yaburi 22 - ALLALA KUMƐ

Kinikini Diyi Yɛlɛma-Koe Tantoli-Bɛti La

¹ E, nta Alla, nfenna i wara n boloka? N bara n kan nabɔ i ma alako i ni n dɛnbɛ kɔnɔ ha bi, i ma na wɛ.

² Nta Alla, n bi i rakelela tele rɔ kɔnɔ i ti a labira. N bi i rakelela suyi rɔ fanan kɔnɔ do ti bɔ nta tɔrɔyɛ la.

³ Kɔnɔ hali wo, ile le mansa-sɛnimɛ la Isirɛla kun na. A bɛnta ile le ni tanto.

⁴ Ma benbanu bara la i la nun. Anu lanɛ i la min kɛ, wo le ya a ma, i ya anu kisi.

⁵ Anu ya i rakele, i ya anu natanka. Anu lanɛ i la min kɛ, woletɔ i ma anu baya.

⁶ N sa hadama-denya la tun. N mani de gbɛ iko tunbi bawo mɔgɛnu bi nyimala n tɔ.

⁷ Minnu ba n yen, wonu si n mayɛlɛn. Anu bi anu nagan labɔla n ma ka anu kunyɛnu tamaga.

⁸ Anu kɛnɛna a fɔla ko, “I lanɛ Mari min na nun, nfenna wo ti i kisi? Ni i di Mari ye bɛrɛbɛrɛ-wɛ-kɛ, nfenna a ti i dɛnbɛ?”

⁹ Ile le ya a ma, n na ya n kɛndɛ sɔrɔn. Ile le ya n nabɔ a rɔ wo tumɛ n bi n susunna.

¹⁰ Kebi n sɔrɔnta lunyɛ min, n lanɛ i la ko nta Alla le ile la.

¹¹ I kana ta n ma wula la. Tɔrɔyɛ sa n ma wula la tun, ado n dɛnbɛna-gbɛrɛkɛ sa.

¹² N yogenu bara a mini n ma iko mɔgɛ tenbi sɔni Basan tura-feremɛnu tɛma.

¹³ Anu bi tugula n kan ma iko yara-bulan-kɔnkɔtoe tenbi a de-nyini-fan tafarala.

¹⁴ N sɛnbɛ bɛɛ ara ban fegba iko yi wa bon dugi ma. N natugurun-nya bɛɛsi ara bɔ anu nyɔgɔn na. N yisi ara lee iko li-kɛɛn.

¹⁵ N kan la ara gbala iko daga-gbɛnkian. N nagan ara nɔrɔn n naganagan la. I ya n bolokanɛ to gbangban rɔ iko furi.

¹⁶ N namininɛ karagbɛlɛnu bolo. Anu bi tola anu gbɛrɛnna n ma iko wulu-kurɔn. Anu bi n bolenubɛ n kian mafarafarala.

¹⁷ N kole bɛɛ ara bɔ gbɛ rɔ. N yogenu bi anu yɛ gbangbanna n tɔ.

¹⁸ Anu bi korɔn lakɛla nna fɛrɛya-bɔɛla ko la alako anu ni wonu tala anu nyɔgɔn na.

¹⁹ E, n Mari, i kana ta n ma wula la. Na tiriya ka n sɛnbɛ don.

²⁰ N natanka alako anu kana n mɔnima-fagɛ-kɛ. N niyi latanka wuli kɛnu masibɛ ma.

²¹ N bɔ yarɛ kɛnu bolo. N dɛnbɛna sa tura-feremɛ kɛnu tɛma.

²² Nna mɔgɛnu ba anu nadɛn i bato tinɛ tumɛ min, n si n dantɛgɛ anu ye ka i tanto anu bɛɛ yala.

²³ N si to a fɔla anu ye ko, “Wole Marita wɔli-kɛlɛnu, wo ni to a tantola. Wole Yakoba kegeyɛnu, wo ni Mari gbiliya.

²⁴ A ti nyina ata mɔgɔ-tɔrɔnɛ ko ka a kan-kɔ sɔ wo la. A wa nyinikalɛ kɛ dɛnbɛn-koe rɔ wati min, Mari si a yabi.”

²⁵ Ka a tɛgɛ ila ko-nyimɛ ma, n si i tanto mɔgɛ bɛɛ yakɔrɔ Bato-Bɔn la. N bara lanyiri kiri sarakɛ minnu bara-koe la, n si wonu bɔ i ye bɛɛ yala.

²⁶ Bolo-kolɔnnu si fa iko a di anu ye nya min. Minnu bi nala Mari bato tinɛ, wonu si a tanto. Alamɛ anu taranta anu diya anu siyi-tele-bɛɛ rɔ.

²⁷ Sibole bɛɛ hɛnkili si to Mari ko. Anu si anu ya-lamunun Mari la duninya-tonko-nanɛ bɛɛ rɔ. Sibole bɛɛ si a bato.

²⁸ Mari kelen pe le mansɛ la. Ale le si mɔgɛ bɛɛ mara!

²⁹ Hali mɔgɛ minnu wasinɛ, wonu si anu madu ka a bato, ado hadama-dan bɛɛ si a madu ka a bato.

³⁰ Ma kegeyɛnu si ala wɔlɛ kɛ. Wonu si ma tigi wara-koe fɔ anuta dannu ye.

³¹ Hali minnu ma sɔrɔn bɛ, wonu si a lamɔɛn ko, “Ma tigi ara ala mɔgɛnu kisi.”