Yaburi 21 - ALLALA KUMƐ

Tantoli Kɛ-Koe Nɔlɛ Wara-Koe La

¹ E, Mari, mata mansɛ ara sewa bawo i wara ila sɛnbɛ di a ma. A ara nyagalen bawo i wara a ma, a ara a yogenu nɔ.

² A miriya ye min bɛɛ ma, i wara wo bɛɛ kɛ a ye. A ara i matara min bɛɛ ma, i wara wo bɛɛ di a ma.

³ Ile Mari ya mala mansɛ sɛnibɔ ka bɔ kɛlɛ rɔ duwa-belebele la. I ya mansaya-fulɛ sigi a kunyɛ la min nadannɛ sɛnɛ la.

⁴ A ya i manyinika simayɛ wara-koe la, ado i wara a ma, a mɛra mansayɛ la.

⁵ Ka a tɛgɛ ila dɛnbɛnɛ ma, a ya gbiliya-belebele sɔrɔn. Ile Mari ya a ma mansa-tɔgɔlamɛ la. A mankan tara wuu!

⁶ Ila duwɛ ye a fɛ burubukai! A sewanɛ bawo i ye a fɛ.

⁷ Ale mansɛ lanɛ ile Mari Sɛnbɛ-Bɛɛ-Tigi la ka a tɛgɛ ile Marita keninteya-dannatɛgɛbɛlɛ ma. Mansayɛ ti bɔ ala bɔn la.

⁸ Mansɛ si a yoge damasi bira gbuturu! Ale mansɛ gbo min bɛɛ ye, a si wonu bira.

⁹ Mansɛ yisi wa bɔ, a si a yogenu kasara iko tɛ wa nɔrɔn bira. Mari si anu ban ala fondo-bɔɛ la. Ata tɛ si anu mintan gburr!

¹⁰ Anu kegeya-wo-kegeya ti to. Mansɛ si anu ban fegba!

¹¹ Mansɛ yogenu si anu kɔnkɔn ko-yogomɛ ma mansɛ tɔgɔ rɔ kɔnɔ anu ti a nɔ.

¹² A si a ma, ala kɛlɛ-dannu ni kalabɛn lakɛ anu ma. Wo si a ma, anu ni anu buri anu kɔrɔ.

¹³ E, Mari, ma si i tanto ila sɛnbɛ-makawanɛla ko la. Ma si bɛtinu bɔ ka ita sɛnbɛ matɔgɔ.