Yaburi 18 - ALLALA KUMƐ

Kulan Fɔ-Koe Dawuda Bolo

¹ Mari di n ye kosɛbɛ! N kumafunfannɛ le ale la.

² Mari le n natankalɛ la. Nna tarɛ le ale la, n si kisi ale le tɔ. Ale le si n tanka ko-yogomɛ ma. Nta farɛ le Alla la, n si n dogon min kɔma. A si n nakanan iko nɛgɛ-walan. Nna kɛlɛ-kɛlɛ le ale la min si n kisi.

³ N ba Mari rakele tumɛ min, a si n kisi n yogenu ma. N si Mari tanto!

⁴ Sayɛ tora n nafoola. Lakira tora n nakilanna.

⁵ Saya-masibɛ tora n nafoola. Kanbɛ ya gbɛrɛ lasigi n ye.

⁶ N bi yakɔrɔ-mamɔɛ wo la n bolo tumɛ min, n ya nta Mari Alla rakele alako a ni n dɛnbɛ. A ya n kan wo lamɔɛn ata Bato-Bon-sɛnimɛ la. A ya a wɔlɔ matɔlɔ n di-kɛ-kan la.

⁷ Marita fondo-bɔɛ ya a ma, dugu-kole ramagara ka yɛrɛyɛrɛn. A ya kɔnkɛnu kurukɛ tinɛ layɛrɛyɛrɛn.

⁸ A fonde bɔnɛ min kɛ, a mara iko ta-sisi ye bɔla a sunyɛ rɔ. A mara fanan iko ta-wɔlɔn le a karɛ rɔ. Wo damasi mara bawo a fonde bɔnɛ.

⁹ A ya san-kole rafara. A yigira ka sɔ banda-finyɛ kuma.

¹⁰ A sigira melika-sufa do la. Wo tora a buri-wɛ kɛla a la fɔnyɔ rɔ duninya kuma.

¹¹ A ya pinpi lamɔrɔmɔrɔ a nyɛrɛ ma. A lafoonɛ banda-fin-digidigi-wɛ la.

¹² San-sɛrɛn-balubalu-wɛ min bi a yarɔ, wo si banda-kole anubɛ ta-yolenu pusen tala. Wonu bi buila banda-fin-digidigi-wɛ wo rɔ.

¹³ Mari min bi Fan Bɛɛ Kun na, wo kan ye bɔla san-kole rɔ iko san-gbalamɛ.

¹⁴ Mari ya san-sɛran lakɛ n yogenu ma iko kalabɛn ka anu tanyɛnsɛn.

¹⁵ Mari nyɛɛra a yogenu ma tumɛ min ka anu makuma, ma ya kɔgɔ-yi dumɛ-kole anubɛ dugu-kurukɛ-tinɛ yen ma yɛ la.

¹⁶ Mari ya a kɔɛn lata ka n songban nna yakɔrɔ-mamɔɛ rɔ.

¹⁷ A ya n natanka n yogenu ma minnu tagbɛlɛ n ko, ado n gbo anu ye kati!

¹⁸ Kɔndɔfili ye n ma wati min, n yogenu buira n ma kɔnɔ nta Mari ya n nakanan wulɔn.

¹⁹ A ya n bɔ gbalo rɔ ka n nakanan bawo n bara-koe di a ye.

²⁰ Mari ya n sara nta telenbagayɛla ko la. A duwara n ye bawo fɛɛ sa n na.

²¹ N ya Marita tɔn bɛɛ bira, ado n ma n kan-kɔ sɔ nta Alla la.

²² N ma Marita sereya-fenfen bɔ a gbɛ rɔ, ado n ma ala tɔn tinya bɛ.

²³ A ya a lɔn ko fɛɛ sa n na, ado n bara n nyɛrɛ mara hakɛ-kɛ-koe ma.

²⁴ Nna telenbagayɛ le ya a ma, Mari ye n sarala, ado a ya a lɔn fanan ko fɛɛ-wo-fɛɛ sa n na.

²⁵ Ni min ya a telen Mari ye, Mari si a telen wo tigi ye. Fɛɛ sa mɔgɔ min na, ale si ko-nyimɛ le dɔrɔn kɛ wo ye.

²⁶ Min sɛninyanɛ, Mari si kun-nadiyɛ di wo tigi ma. Min karagbɛlɛ, ale si a lagbɛlɛya wo tigi kuma.

²⁷ Min famayiginɛ, ale le ye wo lakisila kɔnɔ ni mɔgɛ min wasira, a si wo wara-koe mayigi.

²⁸ E, Mari, nta waan le ile la. Ile le si n to gbɛ rɔ ka pinpi gben n fɛ.

²⁹ I si n yogenu-nɔ-sɛnbɛ di n ma. Ile Alla le ye a mala, n ni yɛlɛ n yogenuna tarɛ ma ka ta anu kɛlɛ.

³⁰ Mata Allala ko-ladan-nyanu telenta. Fɛɛ-wo-fɛɛ sa ala kumɛnu na. Ale manɛ nɛgɛ-walan la wonu ye min bi kisi-tinɛ nyinina ale bolo.

³¹ Mari kelen pe le Alla la. Yon si ma kumafunfan Alla kɔma?

³² Alla le si fanka di n ma. A si kilɛ diya n na.

³³ Ale si a ma, n kian ra ni tɛgɛ dugi ma iko mina. Hali n bi kɔnkɛnu tɛma, a si n sɔ-bole rabɛn.

³⁴ Ale le ya n bole kolo kɛlɛ-kɛ-tinɛ. Hali kalabɛn min nadannɛ silɛɛ la, n si ke a rasaganna ka a lakɛ.

³⁵ E, Mari, i wara n nakanan. I wara n dɛnbɛ woletɔ n bara ma tɔgɔlamɛ la.

³⁶ E, Mari, i wara kilɛ rabɛn n ye, n si tagama kan min woletɔ n ti bui.

³⁷ N tora n yogenu sagaranna. N ma sɛgi muk, fɔ n ya anu nato min kɛ dogbe!

³⁸ N ya anu gbesi dugi la. Anu ma ke anu nasɔla tun. Anu tora sani n kɔrɔ.

³⁹ E, Mari, ile le ya ila sɛnbɛ ma n makiri-fan la, ha n yogenu buira n kɔrɔ ka anu nyɛrɛ latenbi n ma.

⁴⁰ I ya a ma, n yogenu ya anu buri n kɔrɔ. Wo le ya a ma, n ya anu kasara.

⁴¹ Anu bi anu dɛnbɛnɛ nyinina kɔnɔ anu ma anu dɛnbɛna sɔrɔn. Hali anu ya ile Mari rakele, i ti i wɔlɔ matɔlɔ anu na.

⁴² N ya anu bunden iko fɔnyɔ ye tala gbangban min na. N ya anu tadon iko bore min bi kilɛ la.

⁴³ Nta mɔgɛ minnu murutiyara n ma, i ya n nakisi wonu masibɛ ma. I ya a ma, n tora mansayɛ la nyamanɛ kun na. Hali n ma sibole minnu lɔn nun, wonu bara anu nyɛrɛ latenbi n ma kaka.

⁴⁴ Sibolo-gbɛrɛ minnu ba n tɔgɛ lamɔɛn, wonu si anu madu n kɔrɔ ka anu bole sa anu dɛ la kilan bolo.

⁴⁵ Yigi-tɛgɛ ya a ma, anu bɔra anu dogon tinɛnu tɔ kumakɔɛ bolo.

⁴⁶ Ale Mari ye nyɔ. Nta farɛ le ale la min si n kandan. Ale Alla min makawara, min ya n nakisi, a bɛnta, n ni ale matɔgɔ!

⁴⁷ Ale le ye a mala, n bi n yogenu nɔla ka sibolo-gbɛrɛnu don nna sɛnbɛ kɔrɔ.

⁴⁸ Ale le ye n bɔla n yogenu bolo la ka n nafɛrɛ. E, Mari, i ye a mala, n bi nɔ-ko sɔrɔnna n yogenu ma. I ye n nakananna karagbɛlɛnu masibɛ ma.

⁴⁹ N si sigi sa ka i matɔgɔ duninya yala. N bi tantoli-bɛti bɔla i ye.

⁵⁰ Ale Alla le ye a mala, nde, ata mansa-yabɔnɛ ni nɔ-ko sɔrɔn. A ye ata keninteyɛ yirala nde, Dawuda anubɛ n kegeyɛ la burubukai!