Yaburi 146 - ALLALA KUMƐ

Ma Kisilɛ-Alla Tantoli-Koe

¹ N si Mari tanto. N si Mari tanto n sɔndɔmɛ bɛɛ la.

² Fananta n bi n niyi la, n bi a matɔgɔla. N si bɛti bɔ nta Alla ye n siyi-tele-bɛɛ kɔrɔ.

³ I kana i yigi sa kun-tiginu tɔ. Wo fenfen ti ke i kisila.

⁴ Anu ba faga, wo bɛɛ si ma bɔnkɛ la tun. Wo wa ma tumɛ min, anuna ko-rabɛn bɛɛ ara ban.

⁵ Mɔgɔ-sewanɛ le mɔgɛ wo la, Yakobata Alla ye min dɛnbɛna, ado a yigi bɛnnɛ ata Mari Alla le ma.

⁶ San-kolo wo, dugu-kolo wo, kɔgɔ-yi wo, anubɛ min bi anu tɔ, ale le ya wo bɛɛ dan. Tuma-wo-tuma, a si ala lanyirinu natɔnbagaya.

⁷ Minnu niyi ragbɛrɛnnɛ anu ma, a si yo di wonu ma. A si kɔnkɔtoenu de-nyini. Mari si mɔgɔ-biranɛnu to anu diya.

⁸ A si fiyɔnnu yɛ laka. A si mɔgɔ-buinɛnu nasɔ. Telenbagɛnu di Mari ye.

⁹ Mari kɛnɛna kɛɛ-musinu anubɛ kelennɛnu dɛnbɛna. A si sibolo-gbɛrɛnu natanka minnu bi ma tɛma kɔnɔ a si karagbɛlɛnu nata anu kasara tinɛ.

¹⁰ Mansɛ le Mari la tolon! A ye Allayɛ la Yerusalɛm ye habadan! Ma ni Mari tanto.