Yaburi 145 - ALLALA KUMƐ

Matɔgɔ-Bɛti

¹ E, nna mansɛ Alla, n si i makawa-nya lawanka mɔgɛnu ye. N si to i tantola habadan!

² Tele-wo-tele, n si baraka bira i ye. N si i tɔgɛ gbiliya burubukai!

³ Mari makawara, ado a bɛnta, mɔgɛ ni a matɔgɔ. A makawa-nya ti yen.

⁴ Denbɛnu si ila ko-makawanɛ rakaran anuna dannu ye. Anu si ila wɔli-nyimɛ faranfasi anuna dannu ye.

⁵ Anu si to ila gbiliyɛ anubɛ mansaya-mankan fɔla anu ye. N si to n mirila ila wɔli-makawanɛnu ma.

⁶ Mɔgɛnu si ila ko-makawanɛnu bara-koe fɔ. Nde nyɛrɛ si ila bonya wara-koe rakaran.

⁷ Anu si ila ko-nyimɛ wara-koe fɔ ka to bɛti bɔla ila wɔli-nyimɛla ko la.

⁸ Mari fanɛ keninteyɛ anubɛ kinikinɛ la. A ti diminya tiriya, ado dan sa ala keninteyɛ la.

⁹ A nyimayanɛ mɔgɛ bɛɛ ma. A hinante ala dali-fannu ma.

¹⁰ Mari, ila fen-nadannɛ bɛɛ si i matɔgɔ. Ila mɔgɛ bɛɛ si baraka bira i ye.

¹¹ Anu si ila mansaya-mankan gbiliya. Anu si to ila sɛnbɛ wara-koe rakaranna

¹² alako bɛɛ ni ila wɔli-makawanɛ nya-yen. Bɛɛ ni ila mansaya-gbiliyɛ lɔn.

¹³ Habadan-koe le ila mansayɛ la, ado ila mansayɛ si to nyɔ tolon! Mari si ata lanyiri bɛɛ latɔnbagaya. A si koe bɛɛ ladan kinikinɛ le tɔ.

¹⁴ A ye mɔgɔ-tɔrɔnɛnu dɛnbɛna. A ye mɔgɔ-buinɛnu nawulila.

¹⁵ E, Mari, nima-fan-bɛɛ-yigi ye ile la, ado i ye anu de-nyinina anu de-nyini-tumɛ rɔ.

¹⁶ I tenbi anu de-nyinina, dɔn-fan ye a bɔla anu bolo.

¹⁷ Mari telennɛ ala ko-ladan bɛɛ rɔ, ado a kinikinite ala ko-ladan-bole bɛɛ rɔ.

¹⁸ Minnu bi a rakelela, a gbɛrɛnnɛ wonu denu ma, minnu bi a rakelela tonyɛ la, kɔni.

¹⁹ Makolamɛ minnu bi a gbiliyala, a si wonu makoe nyinya. A si anu di-kɛ-kan lamɔɛn ka anu kisi.

²⁰ A di min bɛɛ ye, a si wonu nakanan kɔnɔ a si karagbɛlɛnu kasara.

²¹ N si to Mari tantola tolon! A bɛnta ala dali-fannu ni a tɔgɔ-sɛnimɛ tanto habadan!